Амман қаласында дәстүрлі қытай музыкасының концерті өтіп, иорданиялық көрермендерге Қытайдың бай мәдени мұрасымен жақынырақ танысуға мүмкіндік берді.
«Жібек жолы бойындағы үндестік» ұранымен өткен іс-шараға 230-дан астам қонақ қатысты. Олардың қатарында Иордания ханшайымы Джалила бинт Әли, Қытайдың Иорданиядағы елшісі Го Вэй, Иорданияның Мәдениет министрі Мұстафа Әл Равашеде және Иордания Корольдік кино комиссиясының басқарушы директоры Моханнад Әл Бакри болды.
Концертке Қытайдың әр өңірінен келген музыканттар қатысып, дәстүрлі музыкалық шығармаларды орындады. Сонымен қатар, көрермендерге Хайнаньдағы кокос жаңғағын ою өнері мен сабаннан тоқу сияқты Қытайдың материалдық емес мәдени мұрасының үлгілері таныстырылды.
Го Вэй өз сөзінде мәдениетті шекараларды жойып, адамдардың жүрегін жақындастыратын көпір деп атап, бұл шара иорданиялық көрермендердің шынайы, ашық әрі өркендеп келе жатқан Қытайды тереңірек тануына ықпал етеді деген сенім білдірді.
Оның айтуынша, Қытай Иорданияның Мәдениет министрлігімен және басқа да серіктестерімен бірлесіп, екі халық арасындағы өзара түсіністік пен достықты нығайтатын мәдени іс-шараларды алдағы уақытта да ұйымдастыруға дайын.
«Мен қытай мәдениеті мен музыкасын өте жақсы көремін. Бұл әуендер маған Қытайда көрген ғажайып таулар мен өзендерді еске түсірді», — деді іс-шараға қатысушы Хишам Даджани Синьхуа агенттігіне.
Іс-шара Қытай мен Иордания арасындағы мәдени алмасу мен өзара түсіністікті кеңейтуге бағытталған тұрақты бастамалар аясында Аммандағы Қытай мәдени орталығының ұйымдастыруымен өтті.
