Қытайдың Халық банкі (Орталық банк) 2026 жылдың екінші жартыжылдығында қалыпты жұмсақ ақша-несие саясатын жалғастырып, циклге қарсы реттеу шараларын күшейтеді және экономиканың инновациялық, сапалы әрі тұрақты дамуын қолдау үшін пәрменді қадамдар жасайды. Бұл туралы жексенбі күні жарияланған, жылдың екінші жартысындағы жұмысқа арналған кеңестің қорытынды мәлімдемесінде айтылды.
Қытайдың Халық банкі ақша-несие саясатының құралдарын кешенді түрде қолданып, оларды уақытылы түзетіп отыруға уәде берді.
Сонымен қатар, банк өтімділіктің жеткілікті деңгейін қамтамасыз етіп, қаржы институттарына несие ұсынысының құрылымын оңтайландыруға жәрдемдеседі. Сондай-ақ әлеуметтік қаржыландыру мен ақша массасының өсу қарқыны экономикалық өсім мен жалпы баға деңгейі бойынша күтілетін мақсатты көрсеткіштерге сәйкестендірілетін болады.
Қытайдың Халық банкі облигациялар нарығындағы ғылыми-технологиялық алаңның сапалы дамуына ықпал етіп, технологиялық инновациялар мен мемлекеттік емес кәсіпорындарға арналған облигациялар бойынша тәуекелдерді бөлу тетіктерін кезең-кезеңімен енгізуді жалғастырады. Сонымен қатар ғылыми-техникалық қаржыландыру саласында ақпарат алмасу мен деректерді кешенді пайдалану мүмкіндіктері зерделенеді.
Бұдан бөлек, Қытайдың Халық банкі мемлекеттік емес шағын және орта кәсіпорындарға арналған несие жүйесін жетілдіруді және биылғы жылдың екінші жартысында оларға көрсетілетін қаржылық қызметтердің тиімділігін арттыруды міндет етіп қойды.
