Қытай теңіз платформасынан «Цзелун-3» (Smart Dragon-3) зымыран-тасығышын сәтті ұшырып, Oriental Smart Eye (OSE) 01 және 02 гиперспектралды екі жерсерігін орбитаға шығарды. Аппараттар Қытай аумағын жоғары дәлдікпен қашықтан зондтауға және құрлық пен теңіз акваторияларына жаһандық мониторинг жүргізуге арналған.
Ұшыру Шаньдун провинциясының жағалауындағы акваториядан Тайюань жерсеріктерді ұшыру орталығының көмегімен жүзеге асырылды. Салмағы шамамен 300 келі болатын әрбір жерсерік кеңістіктік ажыратымдылығы 5 метр және қамту жолағы 300 шақырым болатын гиперспектралды сканермен жабдықталған. Олар бір аумақты әр бес күн сайын қайта бақылауға қабілетті.
Жаңа аппараттардың басты ерекшелігі – өнімділігі секундына 400 триллион операцияға дейін жететін кіріктірілген жасанды интеллект есептеу модульдері. Бұл жүйелер деректерді тікелей орбитада өңдеуге, аномалияларды анықтауға, нысандарды тануға және Жерге дайын ақпаратты жіберуге мүмкіндік береді. Соның арқасында нәтижелерді алу уақыты бірнеше күннен бірнеше минутқа дейін қысқарады.
Пайдалануға берілгеннен кейін жаңа жерсеріктер жоғары айырымдылықтағы қолданыстағы ғарыш аппаратымен бірге бірыңғай орбиталық жүйенің құрамына енеді. Бұл кең ауқымды мониторинг пен егжей-тегжейлі бақылау мүмкіндіктерін біріктіруге жол ашады.
