Қытайдың Қаржы министрлігі орталық үкіметтің тікелей басқаруындағы сегіз мемлекеттік қаржы ұйымының капиталын ұлғайту үшін 300 миллиард юань немесе шамамен 44,25 миллиард доллар көлемінде арнайы қазынашылық облигациялар шығарады.
Тартылған қаражат қаржы институттарының бірінші деңгейдегі негізгі капиталын толықтыруға бағытталады. Капиталдың бұл санаты ықтимал шығындарды өтеуге және қаржы ұйымдарының тұрақтылығын арттыруға арналған негізгі резервтердің бірі болып саналады.
Қытай Халық Республикасының Қаржы министрлігі капиталды ұлғайту мемлекеттік қаржы институттарының операциялық мүмкіндіктерін және тәуекелдерге төтеп беру қабілетін нығайтады деп есептейді. Сонымен қатар бұл шара қаржы секторының нақты экономиканы қолдау мүмкіндіктерін кеңейтіп, Қытай экономикасының тұрақты өсуіне ықпал етуге тиіс.
