Қытайдың Гуанчжоу қаласында әлемнің түкпір-түкпірінен келген өндірушілер мен сатып алушылардың басын қосқан 140-шы Кантон жәрмеңкесі жалғасуда. Қытайдағы ең ірі сауда көрмесі халықаралық бизнеске, технологияларды ілгерілетуге және сауда байланыстарын кеңейтуге жаңа мүмкіндіктер ашып отыр.
Жәрмеңке 15 қазан мен 4 қараша аралығында үш кезең бойынша өтеді. 70 жыл ішінде ол 220-дан астам ел мен өңірден сатып алушыларды тартатын жетекші халықаралық сауда алаңдарының біріне айналды. Жәрмеңкенің бүкіл тарихында жасалған мәмілелердің жиынтық көлемі 1,6 трлн долларға жетті.
Биыл шетелдік қатысушылардың ерекше назарын инновациялық әзірлемелер, интеллектуалды жабдықтар мен экологиялық таза өнімдер аударып отыр.
Көрменің бірінші кезеңінде 12 мыңнан астам компания өз өнімдерін ұсынды. Олардың жартысына жуығы жоғары технологиялық, мамандандырылған және инновациялық кәсіпорындар санатына жатады. Алдыңғы жәрмеңкемен салыстырғанда жаңа тауарлар саны 6,7 пайызға, жасанды интеллект қолданылған шешімдер саны 20,5 пайызға, ал экологиялық таза өнімдер саны 13,5 пайызға артты.
Көптеген шетелдік кәсіпкерлер үшін Кантон жәрмеңкесі серіктестер іздейтін тұрақты алаңға айналған. Германиялық кәсіпкер Джан Йылдырым жәрмеңкеге алғаш рет 23 жыл бұрын келіп, содан бері осы жерден тапқан қытайлық жеткізушілермен ынтымақтастығын жалғастырып келеді.
Біріккен Араб Әмірліктерінің кәсіпкері Анис Саджан оның компаниясы ай сайын Қытайдан 500-ден астам контейнер өнім импорттайтынын хабарлады. Оның айтуынша, биыл бизнес көлемі 30 пайызға өскен.
Сонымен қатар шетелдік сатып алушылар дайын тауарларға ғана емес, өз кәсіпорындарын жаңғыртуға арналған технологияларға да барған сайын көбірек қызығушылық танытып отыр.
Мәселен, Шаньдун провинциясындағы қытайлық Bodor компаниясының стендінде лазерлік кесу мен дәнекерлеудің заманауи жүйелері ұсынылды. Оңтүстік-Шығыс Азиядан келген сатып алушылар мұндай жабдықтарды өнеркәсіптік өндірісті цифрландыру үшін пайдаланудың келешегі зор екенін атап өтті.
Кантон жәрмеңкесі шетелдік компаниялардың Қытай нарығына шығу мүмкіндіктерін де кеңейтіп келеді. Мұнда 2007 жылдан бері импорттық тауарлардың арнайы экспозициясы жұмыс істейді.
Көрменің екінші кезеңінде бұл экспозицияға 27 ел мен өңірден 213 компания қатысты. Мысыр, Таиланд және Пәкістанды қоса алғанда, тоғыз мемлекет ұлттық павильондарын ұсынды.
Жәрмеңкеге тұрақты қатысып жүрген Польша-Қытай сауда палатасының бас директоры Доминик Бледзки Қытайдың ірі өндірістік орталық қана емес, жаңа технологиялар, идеялар мен дизайнерлік шешімдердің де маңызды көзіне айналып келе жатқанын атап өтті.
Көрме қатысушылары халықаралық сауда байланыстарының дамуы технологиялар алмасумен, бірлескен әзірлемелермен және өнеркәсіптік ынтымақтастықтың жаңа бағыттарын іздеумен барған сайын тығыз ұштасып отырғанын атап көрсетеді.
