Қытайдың Циндао қаласында 2026 жылғы Мұхитты дамыту жөніндегі жаһандық форум өтті. Онда әлемдік теңіз экономикасының жай-күйі туралы жаңа деректер, интеллектуалды мониторинг жүйелері және теңіз ортасын қорғауға бағытталған бастамалар таныстырылды.
Форумның басты оқиғаларының бірі «Әлемдік теңіз экономикасының дамуы туралы баяндама — 2026» және «Қытайдағы мұхиттың даму индексі — 2026» атты екі талдамалық баяндаманың таныстырылымы болды.
Бірінші құжат теңіз экономикасының тоғыз негізгі саласын және жағалауда орналасқан 30-ға жуық мемлекетті қамтиды. Онда саланың 2025 жылғы негізгі даму үрдістері талданған.
Екінші баяндамаға сәйкес, 2025 жылдың қорытындысы бойынша Қытайдағы мұхиттың даму индексі 132,3 тармаққа жетіп, жылдық есепте 2,5 пайызға өсті. Бұл көрсеткіш экономикалық дамуды, ғылыми-техникалық инновацияларды, экологиялық жағдайды және басқа да факторларды ескереді.
Форум қатысушыларына теңіз ортасына жаһандық мониторинг жүргізуге арналған кешенді деректер жиынтықтары да ұсынылды. Бұл жүйелер жерсеріктік бақылауларды, тікелей өлшеулерді және жасанды интеллект технологияларын біріктіріп, су температурасын, толқындардың жай-күйін, тайфундарды және экологиялық өзгерістерді қадағалауға мүмкіндік береді.
Кездесудің тағы бір нәтижесі Мұхит онжылдығы аясындағы жаһандық бастаманың жариялануы болды. Ол жағалаудағы қалалар арасындағы ынтымақтастықты кеңейтуге, теңіз экожүйелерін қорғауға және «көгілдір» экономиканы дамытуға бағытталған.
Қытайдың теңіз экономикасындағы ірі орталықтарының бірі саналатын Шаньдун провинциясының даму мүмкіндіктеріне ерекше назар аударылды. 2025 жылы провинцияның жалпы теңіз өнімі 1,9 трлн юаньға жетіп, ел өңірлері арасында екінші жоғары көрсеткішті тіркеді.
Провинция билігі экологиялық таза кеме қатынасын, теңіз энергетикасының жаңа бағыттарын және мұхит ресурстарын орнықты пайдалануға арналған технологияларды дамытуды жалғастыруды көздеп отыр.
Мұхитты дамыту жөніндегі жаһандық форум 2024 жылдан бері өткізіліп келеді. Оның ұйымдастырушылары — Шаньдун провинциясының үкіметі мен ҚХР Табиғи ресурстар министрлігі. Бұл алаң теңіз экономикасының даму келешегі мен экологиялық қауіпсіздік мәселелерін талқылау үшін мемлекеттік құрылымдардың, халықаралық ұйымдардың, ғылыми институттар мен бизнес өкілдерінің басын қосады.
