Қытайдың SEPCOIII Electric Power Construction компаниясы Кениядағы «Олкария-I» геотермалдық электр станциясын жаңғырту жұмыстарын аяқтады. Нәтижесінде геотермалдық бу шығынын арттырмай-ақ нысанның белгіленген қуаты 45 МВт-тан 63 МВт-қа дейін ұлғайды.
«Хеллс-Гейт» ұлттық паркінде орналасқан электр станциясы 1980-жылдары пайдалануға беріліп, Африка құрлығындағы алғашқы геотермалдық станция атанды. Қырық жыл ішінде оның жабдықтары айтарлықтай тозып, ауқымды қайта жаңғырту қажеттілігі туындады.
2023 жылдың тамызында басталған жобаны Қытайдың Power Construction Corporation of China корпорациясының құрамына кіретін SEPCOIII компаниясы жүзеге асырды.
Мамандар барлық үш энергоблокты жаңғыртып, ескірген жабдықтарды ауыстырды, салқындату жүйелерін жаңартты және бу беруді оңтайландырды. Бұл ретте инженерлер станцияның негізгі инфрақұрылымын сақтап, оның жұмыс тиімділігін арттыра алды.
Жоба жетекшісінің орынбасары Чжан Янның айтуынша, жұмыс істеп тұрған электр станциясын қайта жаңғырту жаңа нысан салудан күрделірек болды. Өйткені заманауи жабдықтарды қолданыстағы құрылымдарға біріктіру қажет еді.
Жаңғырту барысында Қытайда өндірілген конденсаторлар, сорғылар мен салқындату мұнаралары пайдаланылды. Жоба аясында қытайлық және кениялық мамандар арасында техникалық тәжірибе алмасу да қарастырылды.
Кенияның KenGen энергетикалық компаниясының өкілі Морис Авуор станция қуатының 63 МВт-қа дейін ұлғаюы елдің ұлттық энергетикалық жүйесін қосымша нығайтуға мүмкіндік бергенін атап өтті. Қазір жаңғыртылған нысан елдегі электр энергиясын өндірудің жалпы белгіленген қуатының шамамен 2 пайызын құрайды.
Геотермалдық энергетика Кенияны электр энергиясымен қамтамасыз етуде шешуші рөл атқарады. Ұлттық энергетикалық реттеушінің мәліметінше, елде өндірілетін электр энергиясының шамамен 40 пайызы осы салаға тиесілі.
Күн және жел электр станцияларынан айырмашылығы, геотермалдық нысандар ауа райы жағдайлары мен тәулік уақытына қарамастан, салыстырмалы түрде тұрақты электр энергиясын өндіруге қабілетті.
Кения 2030 жылға қарай геотермалдық электр станцияларының белгіленген қуатын 1681 МВт-қа дейін жеткізуді және электр энергиясын толықтай экологиялық таза көздерден өндіруге көшуді жоспарлап отыр.
KenGen өкілдерінің атап өтуінше, «Олкария-I» станциясын жаңғырту электр энергиясына өсіп келе жатқан сұранысты қанағаттандыруға, өнеркәсіпті қолдауға және энергетика секторының мұнай мен газдың әлемдік бағаларының құбылуына тәуелділігін азайтуға көмектеседі.
