Жаңа технологиялар, роботтандырылған жабдықтар мен экологиялық таза өнімдер Қытайда өтіп жатқан 140-шы Кантон жәрмеңкесінде шетелдік сатып алушылардың басты назарын аударды. Шетелдік делегациялар көрме стендтеріндегі жаңа өнімдермен танысып қана қоймай, өндірістік кәсіпорындарға да барып жатыр.
Жәрмеңкенің екінші кезеңінде құрылыс материалдары, тұрғын үйлерді жабдықтауға арналған шешімдер, интеллектуалды тұрмыстық техника және басқа да тұтыну тауарлары ұсынылған. Экспозициядағы жаңа өнімдердің үлесі 24,2 пайызды, экологиялық таза тауарлардың үлесі 26,9 пайызды, ал зияткерлік меншікке қатысты өз құқықтары бар өнімдердің үлесі 25 пайызды құрайды.
Жасанды интеллект қолданылған әзірлемелер ерекше қызығушылық тудырып отыр. Мәселен, Guangdong Aican Technology компаниясы ет тағамын он минуттан сәл астам уақытта дайындаған робот-аспазды көрсетті.
Көрме қатысушыларының айтуынша, шетелдік тапсырыс берушілер экологиялық тазалық пен интеллектуалды функцияларды ұштастыратын өнімдерге барған сайын көбірек басымдық беруде. Кешенді технологиялық шешімдерге әсіресе Азия-Тынық мұхиты аймағы елдерінің сатып алушылары жоғары қызығушылық танытып отыр.
Сонымен қатар Қытайдың өндірістік кәсіпорындарына деген қызығушылық та артып келеді. Гуанчжоудағы TCL кондиционерлер зауытында шетелдік қонақтарға әр жеті секунд сайын бір кондиционер шығара алатын автоматтандырылған өндірістік желілер көрсетілді.
Кәсіпорын күн панельдері мен энергия жинақтау жүйелерін де пайдаланады. Жәрмеңкенің бірінші кезеңінде зауытқа күн сайын әлеуетті серіктестердің 20-дан 40-қа дейінгі делегациясы барған.
Интеллектуалды өндірісті дамыту Қытай өнеркәсібінің басым бағыттарының біріне айналып келеді. Елде қазірдің өзінде озық деңгейдегі 13 мыңнан астам «ақылды» зауыт және ең жоғары деңгейдегі 500-ден астам кәсіпорын құрылған.
ҚХР Өнеркәсіп және ақпараттандыру министрлігінің бас инженері Ван Вэйминнің хабарлауынша, ведомство өнеркәсіпте жасанды интеллектіні қолдану аясын кеңейтуге бағытталған жаңа шараларды әзірлеп жатыр.
Интеллектуалды жүйелерді өндірістің барлық кезеңдерінде — жабдықтарды басқарудан бастап технологиялық шешімдер қабылдауға дейін — анағұрлым белсенді пайдалану жоспарланып отыр. Бұл кәсіпорындарға шығындарды азайтуға, еңбек өнімділігін арттыруға және әлемдік нарықтағы бәсекеге қабілеттілігін нығайтуға көмектесуі тиіс.
