Қытайдың Botanee Group компаниясы Ереванда өткен БҰҰ-ның Биологиялық әртүрлілік туралы конвенциясы тараптарының 17-ші конференциясында (COP17) ғылыми зерттеулерді, табиғатты қорғауды және өсімдік ресурстарын өнеркәсіптік мақсатта пайдалануды біріктіретін таулы өңірлерді орнықты дамыту моделін таныстырды.
26 қазанда компания таулы аймақтардың биоэкономикасын дамытуға арналған іс-шараның бірлескен ұйымдастырушысы болып, серіктестерімен бірге «Инклюзивті тау биоэкономикасы туралы Ереван декларациясын» қабылдау бастамасын көтерді.
Құжат биоалуантүрлілікті сақтау шараларын күшейтуді, жергілікті қауымдастықтарды қолдауды және табиғи ресурстарды пайдаланудан түсетін экономикалық пайданы әділ бөлуді көздейді. Дәстүрлі білімді, ғылыми зерттеулерді және заманауи технологияларды ұштастыруға ерекше назар аударылады.
Botanee Group өкілі Чжун Вэй компания әзірлеген және Қытайдың Юньнань провинциясында қолданылып жүрген «зерттеу — сақтау — индустрияландыру» моделі туралы айтып берді.
Ғылыми және білім беру мекемелерімен 12 жылдық ынтымақтастық барысында компания мамандары өсімдіктердің 2000-нан астам түрін зерттеп, олардың арасынан тері күтіміне арналған құралдарда қолдануға перспективалы белсенді компоненттері бар 266 түрді анықтады.
Сирек кездесетін өсімдіктерді сақтау мақсатында Botanee Шангри-Ла ауданындағы қарлы Хаба тауының етегінде ғылыми-өндірістік база құрды. Мұнда сирек кездесетін биік таулы өсімдіктердің 20-дан астам түрін жасанды жолмен көбейту және табиғи мекендеу ортасына қайта жерсіндіру жұмыстары жүргізілуде.
Сонымен қатар компания жергілікті фермерлермен «кәсіпорын — өндірістік база — фермерлік шаруашылық» моделі бойынша ынтымақтастықты дамытып келеді. Мұндай тәсіл ауыл тұрғындарына өсімдік шикізатын өсіру және жеткізу арқылы табыс табуға мүмкіндік береді.
Botanee мәліметінше, 2024 жылы жергілікті өсімдік ресурстарын пайдалануға негізделген өндірістік тізбек құны 10 млрд юаньнан асатын қосымша өнім көлемін қамтамасыз етті. Бұл ретте шикізаттың 53,8 пайызы жергілікті жеткізушілерден алынған.
Компанияның тәжірибесі табиғатты қорғау қызметін таулы аумақтардың экономикалық дамуымен ұштастырудың үлгісі ретінде «Тау биоэкономикасын дамытудың жаһандық негіздемелік бағдарламасына» енгізілді.
Botanee компаниясы бұл модельді одан әрі жетілдіруге және биоалуантүрлілікті сақтау, табиғи ресурстарды орнықты пайдалану мен жергілікті қауымдастықтарды қолдау салаларындағы ынтымақтастықты кеңейтуге ниетті екенін мәлімдеді.
