Қытай мен Швейцария компаниялары жасанды интеллект, биомедицина және жоғары технологиялық өндіріс салаларындағы ынтымақтастықтың жаңа мүмкіндіктерін талқылады. Швейцарияның Шаффхаузен қаласында өткен іскерлік конференция екі елдің мемлекеттік құрылымдары, ғылыми ұйымдары мен бизнес өкілдерінің басын қосты.
Қатысушылар 2018 жылдан бері достық байланыс орнатып келе жатқан Қытайдың Хунань провинциясы мен Швейцарияның Шаффхаузен кантоны арасындағы серіктестікті дамытуға ерекше назар аударды.
Шаффхаузен кантонының Экономикалық даму агенттігінің басшысы Кристоф Шаррер екі өңірдің өнеркәсіптік ынтымақтастықты дамыту үшін айтарлықтай әлеуеті бар екенін атап өтті. Швейцария тарапы жоғары дәлдіктегі өндіріс, робототехника және биотехнология салаларында озық құзыреттерге ие болса, Хунань провинциясының өнеркәсіптік инфрақұрылымы жақсы дамыған.
Хунань провинциясы Коммерция департаменті директорының орынбасары Лю Суюэнің хабарлауынша, екіжақты ынтымақтастықтың ең перспективалы бағыттары — биомедицина мен жасанды интеллект.
Оның мәліметінше, 2025 жылдың соңына қарай Хунань провинциясында биомедицина саласында 80 мыңнан астам кәсіпорын жұмыс істеген. Олардың жиынтық өндіріс көлемі 350 млрд юаньнан (шамамен 52,1 млрд доллар) асты.
Жасанды интеллект саласында 400-ден астам жетекші компания жұмыс істейді, ал саланың көлемі 85 млрд юаньға (шамамен 12,7 млрд доллар) жетті.
Қытай тарапының өкілі провинция шетелдік инвесторларға бәсекеге қабілетті өндірістік шығындарды, дамыған өнеркәсіптік кластерлерді, ауқымды тұтыну нарығын және білікті кадрларға қолжетімділікті ұсынатынын атап өтті.
Конференция барысында Қытайдың құрылыс техникасын өндіруші Zoomlion компаниясы Швейцариядағы қызметін кеңейту жоспары туралы хабарлады. Компания жоғары технологиялық жабдықтарға, жасанды интеллект пен робототехникаға ерекше көңіл бөлуді көздеп отыр.
Zoomlion Global бас директорының орынбасары Абдукейум Абдувакидің айтуынша, қазіргі уақытта компанияның Еуропада жеті еншілес кәсіпорны, бес зауыты және 36 сервистік орталығы бар.
Швейцариялық қатысушылар да Қытаймен іскерлік байланыстарды дамытуға мүдделі екенін білдірді.
Businessincub (Swiss BIC) платформасының негізін қалаушы әрі бас директоры Доминик Ортли Қытай нарығы еуропалық компанияларға зор мүмкіндіктер ашатынын, ал екіжақты ынтымақтастық кәсіпорындарға жаңа серіктестер табуға және халықаралық нарықтағы қатысу аясын кеңейтуге мүмкіндік беретінін атап өтті.
Швейцариялық Athebio AG биотехнологиялық компаниясының тең құрылтайшысы Кристиан Йост Қытайдың, әсіресе химиялық және биохимиялық технологиялар саласындағы инновациялық әлеуеті артып келе жатқанын айтты.
Конференцияны Хунань провинциясының Коммерция департаменті ұйымдастырды. Іс-шараға мемлекеттік органдардың өкілдері, сондай-ақ Швейцарияның 20-дан астам университеті, ғылыми-зерттеу институты мен компаниясының өкілдері қатысты.
Қатысушылар Қытай мен Швейцария арасындағы бірлескен әзірлемелердің, технологиялар алмасудың және инвестициялық ынтымақтастықты кеңейтудің келешегін талқылады.
