Қытай компаниялары Колумбияның ауыл шаруашылығы секторындағы қызмет аясын кеңейтіп, өнімділікті арттыру үшін заманауи техника, тыңайтқыштар, логистикалық қызметтер мен технологиялық шешімдер ұсынып отыр.
Бұл туралы Agrilink компаниясының бас директоры Мария Алехандра Мадрид Боготада өткен Expo Agrofuturo халықаралық ауыл шаруашылығы көрмесінің қорытындысын шығару барысында мәлімдеді.
Іс-шара 14 елден келген 350-ден астам компанияның басын қосты. Көрмені шамамен 14 мың адам тамашалады, ал қатысушылар аграрлық бизнесті дамытуға арналған 2000-нан астам іскерлік кездесу өткізді.
Мадридтің айтуынша, қытайлық кәсіпорындар Expo Agrofuturo көрмесіне алты жыл қатарынан қатысып, Колумбия нарығындағы қызмет аясын жүйелі түрде кеңейтіп келеді.
«Соңғы алты жылда Қытай компаниялары біз үшін аса маңызды серіктестерге айналды», — деп атап өтті ол.
Қытай өндірушілері көрменің ауыл шаруашылығы техникасы мен тыңайтқыштардан бастап жоғары технологиялық жабдықтар мен мамандандырылған қызметтерге дейінгі барлық дерлік тақырыптық бөлімдерінде өз шешімдерін ұсынды.
Сонымен қатар қытайлық компаниялар аграрлық өндірісті дамытуға кешенді тәсіл ұсынып отыр. Бұл тәсіл ауыл шаруашылығы өнімдерін өсіруді ғана емес, өндіріс пен өткізу тізбегінің басқа да кезеңдерін қамтиды.
Мадрид Қытаймен ынтымақтастық Колумбияға ауыл шаруашылығының тиімділігін арттыру үшін қосымша мүмкіндіктер ашатынын атап өтті. Бұл ретте практикалық тәжірибе алмасу мен заманауи технологияларды енгізудің маңызы ерекше.
Қытайлық мамандар іскерлік кездесулер мен кәсіби пікірталастар барысында жергілікті өндірушілермен өз білімдері мен тәжірибелерін бөліседі, сондай-ақ көрмеде жабдықтар мен технологиялық шешімдерді тікелей көрсетеді.
Ұйымдастырушының айтуынша, Expo Agrofuturo көрмесіне қатысу қытайлық компанияларға Колумбия нарығындағы орнын нығайтып қана қоймай, Латын Америкасының басқа елдеріндегі серіктестермен жаңа іскерлік байланыстар орнатуға да көмектеседі.
