Қытайдың Хайнань аралы еркін сауда портының артықшылықтарын белсенді пайдаланып, кәсіпкерлерді, халықаралық компаниялар мен туристерді тартуда. Салықтық жеңілдіктер, оңайлатылған рәсімдер мен ерекше кедендік режим экономикалық өсудің жаңа мүмкіндіктерін ашып отыр.
Жас кәсіпкер Ли Байхун 2026 жылдың сәуірінде Шанхайдан Хайнаньға көшіп келіп, бағдарламалық қамтамасыз етуді әзірлейтін компания ашты. Оның компаниясында жалдамалы қызметкерлер жоқ: барлық жұмысты жасанды интеллектінің көмегімен өзі атқарады. Алты ай ішінде компания шамамен 200 мың юань (30 мың доллар) табыс тапты.
Кәсіпорынды тіркеуге небәрі бір апта уақыт кеткен. Компания кәсіпкерлерге тегін кеңселер, кеңес беру қызметтері мен қаржылық қолдау ұсынылатын Software Community технологиялық қауымдастығында орналасқан.
Қазір мұнда жасанды интеллектіні пайдаланатын 400-ден астам компания және шамамен 700 әзірлеуші жұмыс істейді. Бизнеске қосымша серпін беретін тағы бір фактор — белгіленген талаптарға сәйкес келетін кәсіпорындар үшін корпоративтік табыс салығының 15 пайыздық жеңілдікті мөлшерлемесі.
Халықаралық сауда да қарқынды дамып келеді. Аралдың ең ірі жүк порты Янпуда кедендік бақылаудың интеллектуалды жүйелері енгізілген. Олар жекелеген тауар партияларын үш минутқа жетпейтін уақытта тексеруге мүмкіндік береді.
2025 жылдың желтоқсанынан бастап Хайнаньда бүкіл аралды қамтитын ерекше кедендік режим қолданылады. 2026 жылғы 22 қазандағы жағдай бойынша Янпу өткізу пункті арқылы 4104 кеме өткен. Бұл өткен жылдың сәйкес кезеңімен салыстырғанда 11,95 пайызға көп.
Экономиканың тағы бір қозғаушы күшіне бажсыз сауда айналды. Хайнаньда 12 duty-free дүкені жұмыс істейді. Оларда белгіленген талаптарға сәйкес келетін шетелдік туристер де сауда жасай алады. Салық төлемей сатып алуға болатын тауарлардың жылдық шекті құны 100 мың юаньды құрайды.
2026 жылдың қаңтар-қыркүйек айларында Санья қаласындағы бажсыз сауда дүкендерінің сатылымы 16,29 млрд юаньға жетіп, 16,48 пайызға өсті. Дүкендерге келушілер саны 6,29 пайызға артып, 2,4 млн-ға жетті, ал сатылған тауарлар саны 6,24 пайызға көбейіп, 12,59 млн дананы құрады.
Цифрлық бизнестің, халықаралық логистиканың және туризмнің дамуы Хайнаньның Қытайдағы болашағы зор сауда-экономикалық орталықтардың бірі ретіндегі орнын нығайтып келеді.
