Қазақстанның Испаниядағы Елшісі Данат Мұсаев Элькано Корольдік институтының президенті Хосе Хуан Руиcпен кездесті, деп хабарлайды DKNews.kz.
Тараптар Қазақстан мен Испания арасындағы екіжақты қарым-қатынастарды, сондай-ақ халықаралық тақырыптағы өзекті мәселелерді талқылады.
Қазақстан Республикасындағы ішкі саяси күн тәртібіне тоқталған Елші елімізде жүргізіліп жатқан саяси және әлеуметтік-экономикалық реформалар туралы егжей-тегжейлі айтып берді.
Х.Х. Руис жетекші аналитикалық орталықтың сарапшылары қазақстандық әріптестерімен ынтымақтастық орнатуға, сондай-ақ ғылыми және практикалық тақырыптарды бірлесіп зерттеуді бастауға дайын екенін мәлімдеді.
Өз кезегінде қазақстандық дипломат бұл мақсаттарға қол жеткізуге жан-жақты көмек көрсетуді ұсынды.
Тараптар жақын арада Қазақстанның ішкі және сыртқы саяси жағдайына арналған бірлескен іс-шара өткізуге келісті.
«2020 Global Go to Think Tanks Index Report» зерттеуі бойынша, 2020 ж. халықаралық қатынастар саласындағы маңызды еуропалық институттар арасында брюссельдік «Bruegel»-ден кейін Элькано Корольдік институты екінші орын алған. Пенсильвания Университетінің мәліметтеріне сүйенсек, ЭКИ әлемдік рейтингте 11-ші орында. Сонымен қатар, институт көптеген жылдар бойы Испаниядағы талдау орталықтары арасында көшбасшы болып келеді.
