Қазақстан мен Франция арасында экономика саласындағы ынтымақтастық қарқынды дамып келеді, деп хабарлайды DKNews.kz.
Париж қаласында француз тарапынан тең төраға, «Vicat» компаниясының президенті Ги Сидостың басшылығымен Қазақстан-француз іскерлік кеңесінің (ҚФІК) кезекті 12-ші отырысы өтті. Қазақстан тарапынан Қазақстанның Франциядағы Елшісі Гүлсара Арыстанқұлова, ҚР Страсбург қаласындағы Бас консулы Анель Бақытбекқызы, Париждегі «Атамекен» ҰКП өкілі Ғалымжан Дұғалов қатысты. Қазақстан Елшілігінің қолдауымен MEDEF International кәсіпкерлер қауымдастығы ұйымдастырған іс-шараға 70-тен астам қатысушы жиналды, олардың арасында Францияның жетекші компаниялары, сондай-ақ мемлекеттік органдары мен сарапшылар қауымдастығының өкілдері болды.
Ги Сидос Іскерлік кеңестің өткен жылғы қызметін қорытындылай келе, қазақстандық тараптың тең төрағасы Айдан Кәрібжановпен бірлесіп, оның ішінде француздық компаниялардың Қазақстанға екі бизнес-миссиясын ұйымдастыру, сондай-ақ Экономикалық ынтымақтастық жөніндегі Үкіметаралық комиссияның отырысын дайындауға қатысу және Франция президенті Э. Макронның Астанаға ресми сапары туралы хабардар етті.
Елші Г. Арыстанқұлова өз сөзінде Іскерлік кеңеске Қазақстанмен сауда-экономикалық және инвестициялық ынтымақтастықты тереңдетуге және кеңейтуге қосқан зор үлесі үшін алғысын білдірді. Белсенді бірлескен күш-жігер Франция президентінің Астанаға ресми сапарының экономикалық күн тәртібін жаңа сапалы мазмұнмен толтыруға мүмкіндік бергені атап өтілді.
Француз басшысының сапары барысында бірқатар маңызды бірлескен жобалар, соның ішінде «TotalEnergies» компаниясының Жамбыл облысында қуаты 1 ГВт жел электр станциясын салу, ҚР өңірлерінде «Alstom» компаниясының сервистік орталықтарын құру, сондай-ақ «Boehringer Ingelheim» компаниясымен ветеринарлық вакцина өндіру жаңа серпін алғаны атап өтілді. Сапар барысында қол қойылған тиісті екіжақты ведомствоаралық декларация және «Атамекен» ҰКП мен MEDEF International арасындағы меморандум негізінде жоғары деңгейде, атап айтқанда стратегиялық материалдар саласындағы ынтымақтастықты дамыту бойынша қол жеткізілген уағдаластықтарға ерекше назар аударылды.
Қазақстан Елшісі Францияның іскер топтарын АӨК, ТКШ, экология, денсаулық сақтау, көлік және логистика салаларындағы жаңа жобаларды іске асыру жолымен, оның ішінде ҚР Үкіметімен біздің еліміздегі өз қызметінің шарттары туралы келісім жасасқан Француз даму агенттігінің желісі бойынша ынтымақтастықтың жоғары серпінін қолдауға шақырды. Бұл тұрғыда Мемлекет басшысының Үкімет жанындағы инвестицияларды тарту жөніндегі кеңестің өкілеттіктері туралы Жарлыққа қол қоюына, сондай-ақ Қазақстан экономикасының инвестициялық тартымдылығын арттыруға бағытталған басқа да шараларға назар аударылды.
Өз кезегінде француз серіктестері өз жобаларының ағымдағы жай-күйі туралы хабардар етіп, ынтымақтастықтың перспективалы бағыттарына қатысты көзқарастарымен бөлісті. Отырысқа қатысушылар соңғы жыл экономикалық өзара іс-қимылдың елеулі жандануымен белгіленді, оған Президент Қасым-Жомарт Тоқаевтың 2022 жылы Францияға және Президент Э. Макронның ағымдағы жылғы қарашада ҚР-ға сапарлары күшті серпін берді.
Инвестициялық ахуалды және жүргізіліп жатқан ауқымды реформаларды оң бағалай отырып, Air Liquide, Idemia, Thales және Semmaris сияқты компаниялардың өкілдері қазақстандық тарапқа біздің елімізде жобаларды табысты іске асыруға үнемі назар аударып, қолдау көрсеткені үшін алғыс білдірді.
Отырысының қорытындысы бойынша екіжақты уағдаластықтардың іске асырылу барысын талқылау, сондай-ақ жаңа жобалар мен бастамаларды пысықтау үшін тұрақты байланыстарды қолдау уағдаластығына қол жеткізілді.
Іс-шара аясында Қазақстан мен Франция арасындағы ынтымақтастықты дамытуға және нығайтуға қосқан үлесі үшін ҚФІК бұрынғы тең төрағасы Ив-Луи Даррикаррерге II дәрежелі «Достық» орденін тапсыру салтанатты рәсімі өтті.
ҚФІК екі елдің іскер топтары арасындағы ынтымақтастықты ілгерілету үшін консультативтік-кеңесші орган болып табылады.
