Қазақстандық депутаттар АҚШ-тағы әріптестерімен тәжірибе алмасуда, деп хабарлайды DKNews.kz.
Қазақстан Республикасының Парламенті Мәжілісі мен Сенаты депутаттарының делегациясы «Ашық әлем» серіктестік бағдарламасы бойынша өзара іс-қимыл шеңберінде АҚШ-қа сапармен келді.
Вашингтонда депутаттар Динара Наумова, Никита Шаталов, Руслан Берденов, Ерболат Сатыбалдин және сенатор Евгений Больгерт құрған қазақстандық делегация АҚШ заңнамалық жүйесі қызметінің ерекшеліктерімен, америкалық федерализм тетіктерімен, сондай-ақ Конгрестің ғылыми-зерттеу қызметінің рөлімен танысты.
Конгресмен Джимми Панетта, Том Суоззи және Дэрин ЛаХудпен, сондай-ақ АҚШ Сенатының қызметкерлерімен кездесулер барысында ҚР үшін басым мәселелер талқыланды. Мемлекет басшысының демократиялық күн тәртібін заңнамалық тұрғыдан ілгерілетуге ерекше назар аударылды.
АҚШ заң шығарушылары қазақстандық әріптестерін Конгресс жұмысы туралы хабардар етті және елдер арасындағы парламентаралық ынтымақтастықты дамыту жөніндегі күш-жігерге одан әрі жәрдемдесуге дайындығын білдірді.
Вашингтонда болу бағдарламасы Конгресс ғимаратында ресми қабылдаумен аяқталып, оның шеңберінде Қазақстан, Армения және Грузия делегаттарына ұйымның атқарушы директоры Джейн Саргус, Конгресмендер Роберт Адерхольт және Фрэнк Пэллоне, сондай-ақ аталған елдердің елшілері құттықтау сөз сөйледі.
Қазақстанның АҚШ-тағы Елшісі Ержан Ашықбаев бағдарлама басшылығына іс-шараны ұйымдастырғаны үшін алғыс айтып, екі мемлекеттің заң шығарушы органдары арасындағы өзара түсіністік пен ынтымақтастықты нығайтудың маңыздылығын атап өтті. АҚШ-тағы қазақстандық делегацияның бағдарламасы Алабама штатының Бирмингем қаласында жалғасады.
«Ашық әлем» алмасу бағдарламасын Ашық әлем көшбасшылық орталығы басқарылады және 2008 жылдан бастап Қазақстан үшін іске асырылуда. Бағдарламаның мақсаты – әр түрлі елдердің саяси және қоғам қайраткерлеріне АҚШ-қа баруға, тәжірибе алмасуға және америкалық саяси, экономикалық, білім беру және мәдени ортаның өкілдерімен іскерлік байланыс орнатуға мүмкіндік беру.
