Инновациялар әскерлерді жауынгерлік даярлаудың тиімділігін арттыруға мүмкіндік береді, деп хабарлайды DKnews.kz.
ҚР Қорғаныс министрлігінде Құрлық әскерлерінің жауынгерлік даярлығында жаңа буынды әскери планшеттерді пайдалану жоспарланып отыр. Осылайша Қазақстан әскеріне озық мобильді инновациялар жеткізіледі деп күтілуде.
Алматыда Қорғаныс министрлігі мен Samsung Electronics Central Eurasia ынтымақтастық туралы меморандум жасасты, оның шеңберінде оңтүстік кореялық компанияның жоғары технологиялық өнімдері Қазақстан армиясын одан әрі цифрландыруға қызмет етеді. Айтып отырғанымыз, халықаралық әскери стандарттарға сәйкес келетін және қашықтан басқару мүмкіндігі бар аппараттық және бағдарламалық қамтамасыз етудің кіріктірілген механизмдері бар мобильді планшеттер мен смартфондар жайлы. Үкімет ұлттық қауіпсіздікті қамтамасыз ету стратегиясын жаңғыртуда, ал оның негізгі құрамдас бөліктерінің бірі Қарулы күштерді цифрландыру болып табылады.
– Цифрлық құралдар армияның тиімділігін арттыруға және Қорғаныс министрлігінің қызмет көрсету сапасын жақсартуға бағытталған. Биылғы жылдың басынан бастап «Цифрлық әскери комиссариат» жобасы табысты іске асырылуда. Әскери шақырумен байланысты шығынды шараларды digital-мен іске асыру жыл сайын миллиардтан астам бюджет қаражатын үнемдеуге алып келді, – деді Қорғаныс министрінің орынбасары Дархан Ахмедиев.
Іс-шараларды жоспарлауды цифрландыру және жауынгерлік даярлық нәтижелерін талдауды қамтитын басқа да бастамалар іске қосылады. Бұл процестердің барлығы да жеңілдетіліп, ақпараттық платформаға көшеді.
Арнайы бағдарламалық жасақтамасы бар әскери үлгідегі планшеттер деректермен жұмысты оңтайландыруға мүмкіндік береді. Мысалы, офицерлер ведомствоның жаңа ақпараттық жүйесіне бөлімшелердің жауынгерлік дайындығы туралы ақпаратты енгізеді, осылайша басшылық стратегиялық шешімдерді талдап, қабылдау үшін осы деректерге тікелей қол жеткізе алады. Ақпараттық-коммуникациялық инфрақұрылымның бірыңғай операторы Қорғаныс министрлігінің еншілес ұйымы – «Қазақстан ГАЖ Орталығы» АҚ болады деген болжам бар.
Бұл басы ғана. Қазіргі уақытта қаралып жатқан әлеуетті жобалар бөлімшелердің навигациясын цифрландыруды, басшылық пен бақылауды оңтайландыруды, сондай-ақ барлау мәліметін алу үшін дрондар мен датчиктермен интеграциялауды көздейді. Инновациялық мобильді шешімдерді қолдану келешегі одан да кеңейе бермек.
Бұдан басқа, қол қойылған меморандум шеңберінде Қорғаныс министрлігі мен ведомстволық бағынысты ұйымдардың қызметкерлері Samsung электрондық корпоративтік дүкеніне рұқсат ала алады. Осылайша, олар Оңтүстік Корея компаниясы шығарған техниканы арнайы шарттар бойынша тікелей өндірушіден сатып алу мүмкіндігіне ие болады.
