Тбилисиде Біріккен Ұлттар Ұйымының Еуропалық экономикалық комиссиясы (БҰҰ ЕЭК) мен Еуропа-Кавказ-Орталық Азия көлік дәлізі жөніндегі Үкіметаралық комиссияның Тұрақты хатшылығы (TRACECA PS IGC) және басқа серіктестердің қатысуымен ұйымдастырылған халықаралық семинар өтті, деп хабарлайды DKnews.kz.
Семинар Транскаспий дәлізінде мультимодальды деректерді цифрландыру және құжат алмасу стандарттарын жүзеге асыруға, сондай-ақ Біріккен Ұлттар Ұйымының Сауданы жеңілдету және электрондық бизнес орталығының мультимодальды моделін қолдануға арналды.
Бұл семинар Транскаспийлік дәліз бойындағы мультимодальды деректерді цифрландыру және құжат алмасу бойынша Меморандум мен Жол картасын жүзеге асыру жұмысының жалғасы болды. Аталған құжаттар 2023 жылдың 24 қарашасында Бакуде өткен SPECA президенттік саммитінде қабылданған БҰҰ-ның құқықтық құжаттары мен стандарттарына негізделген.
Семинардың мақсаты – қатысушы мемлекеттермен жұмыс істеп, SPECA Жол картасын орындау арқылы БҰҰ СЕФАКТ стандарттарына сәйкес көлік процестерін мультимодальды цифрландыруды жүзеге асыру. Бұл көліктік ағындарға цифрлық технологияларды интеграциялап, олардың тиімділігі мен ашықтығын арттыруға мүмкіндік береді.
