Оңтүстік Кореяның Қазақстандағы елшілігі Астанада корей диаспорасы мен қазақ-корей ынтымақтастығына арналған саяси семинар өткізеді, деп хабарлайды DKNews.kz.
Іс-шара 2026 жылғы 29 мамырда Sheraton Astana қонақүйінде өтеді. Семинардың тақырыбы – «Диаспора саясаты және тарихи мұра: этникалық корей қауымдастығы арқылы қазақ-корей ынтымақтастығының болашағы».
Семинарда не талқыланады
Ұйымдастырушылардың айтуынша, іс-шараның басты мақсаты – Қазақстандағы корей қауымының тарихын, екі елдің диаспора саясаты мен этносаралық келісім саласындағы тәжірибесін, сондай-ақ корей қауымдастығының Қазақстанның дамуына қосқан үлесін жан-жақты қарастыру.
Семинар келесі бағыттар бойынша өтеді:
- саясат
- тарихи мұра
- адамдар мен қауымдастықтардың рөлі
Бірінші сессия аясында қатысушылар:
- Оңтүстік Кореяның шетелдегі корейлерге қатысты саясатын
- Қазақстанның этносаралық келісім саласындағы тәсілдерін
- «Отандастар қоры» КЕАҚ қызметін талқылайды
Екінші сессия:
- корей қауымының тарихи мұрасына
- тарихи-мәдени нысандарды сақтауға
- бірлескен гуманитарлық бастамаларға арналады
Үшінші сессияда:
- корей қауымының әлеуметтік-экономикалық жетістіктері
- алдағы ынтымақтастық перспективалары
- мемлекеттік саясат саласындағы ұсыныстар қаралады
Сонымен қатар қатысушыларға Қазақстан мен Оңтүстік Корея арасындағы ынтымақтастықтың символдық жобаларының бірі саналатын K-Park бастамасы таныстырылады.
Семинарға кімдер қатысады
Семинарға мемлекеттік органдардың, қоғамдық ұйымдардың және академиялық қауымдастықтың өкілдері қатысады деп күтілуде.
Қатысушылар қатарында:
- Корея Республикасы Ұлттық жиналысының төрағасы У Вон Сик
- Корея Республикасының Қазақстандағы елшісі
- Қазақстан халқы Ассамблеясының өкілдері
- «Отандастар қоры» КЕАҚ өкілдері
- Шетелдегі корейлер ісі жөніндегі агенттік
- Қазақстан корейлері қауымдастығы
- жергілікті атқарушы органдардың өкілдері
- ғылыми қауымдастық өкілдері бар
Сондай-ақ талқылауға Германияның Қазақстандағы елшілігінің өкілдері де қатысады. Ұйымдастырушылардың пікірінше, бұл Орталық Азиядағы диаспоралар тарихы мен интеграциялық үдерістерге халықаралық көзқарас қалыптастыруға мүмкіндік береді.
Мерейтойлық даталарға орай
Іс-шараға бірден екі маңызды дата ерекше мән беріп отыр:
- корейлердің қоныс аударғанына 90 жыл
- Қазақстан мен Корея Республикасы арасындағы дипломатиялық қатынастардың орнағанына 35 жыл
Елшілік өкілдері семинар қоғамдық дипломатия, гуманитарлық байланыстар және диаспора саясаты саласындағы ынтымақтастықты дамытуға жаңа алаң болады деген үміт білдірді.
Фотокөрме мен жастар форумы өтеді
Семинар басталар алдында қонақтарға Корей театрының 90 жылдық тарихы мен Қазақстандағы корейлердің өміріне арналған фотокөрме ұсынылады.
Сонымен қатар бағдарламада:
- Корей театры солисінің өнер көрсетуі
- қатысушыларға арналған фуршет-түскі ас
- Корей жастары форумы
- 2026 жылғы шетелдегі корейлерге арналған бағдарлама стипендиаттарымен кездесу жоспарланған
Ұйымдастырушылардың айтуынша, мұндай алаңдар елдер арасындағы гуманитарлық байланысты нығайтып, корей диаспорасының түрлі буындары арасындағы диалогты дамытуға ықпал етеді.
