Сенатор Нұрлан Бекназаров ТМД ПАА Құқықтық мәселер жөніндегі тұрақты комиссиясына қатысты, деп хабарлайды DKnews.kz.
ҚР Парламенті Сенатының депутаты Нұрлан Бекназаров ТМД Парламентаралық Ассамблеясының Құқықтық мәселелер жөніндегі тұрақты комиссиясының отырысына қатысты. Отырыс ТМД елдерінің заңнамасын үйлестіруге бағытталған үлгі заңдарды талқылау және одан әрі пысықтауда маңызды тұғырнама болды.
Отырыс барысында «Мүлікті меншікке беруге арналған шарттар туралы», «Мемлекеттік кадастрлық бағалау туралы», «Наградага жария уәде беру, жария конкурс, ойындар және бәс тігу міндеттемесі туралы», «Жұмыстарды орындауға және қызметтер көрсетуге арналған шарттар туралы», «Сақтау шарты туралы» және «Делдалдық шарттар туралы» жобалармен қоса негізгі үлгі заңдар қаралды.
Отырысқа қатысушылар Қазақстан Парламенті Сенаты әзірлеген «Отбасылық-тұрмыстық зорлық-зомбылыққа қарсы іс-қимылды құқықтық реттеу туралы» үлгі заң жобасына назар аударды. Нұрлан Бекназаров бұл заң жобасы бойынша жұмыс жалғасып жатқанын және Сарапшылар кеңесінің отырысы барысында айтылған ұсыныстар мен ескертулер ескерілгенін атап өтті. Ол отбасылық зорлық-зомбылыққа неғұрлым тиімді қарсы тұруға ықпал ететін және азаматтардың құқықтарын қорғауды қамтамасыз ету жөніндегі кешенді құқықтық нормаларды әзірлеудің маңызына тоқталды.
Жұмыс қорытындысы бойынша үлгі заңның пысықталған жобасы одан әрі талқылау және бекіту үшін ТМД ПАА Кеңесінің Хатшылығына жіберілетін болды. Тұрақты комиссияның отырысына қатысу парламентаралық ынтымақтастықты нығайту мен азаматтардың құқықтарын қорғауға және құқықтық реттеуді жақсартуға бағытталған ТМД елдерінің заңнамасын жетілдірудегі маңызды қадам болды.
