Елордада Қазақстан-Қытай бизнес форумы басталды. Екі елдің іскер қауымдастығы екі жақты сауда-өнеркәсіптік ынтымақтастықты одан әрі кеңейтуді талқылап жатыр.
Форумға Қазақстан мен Қытайдың 80-ге жуық іскер топ өкілдері қатысуда.
Қытайдың халықаралық сауданы ілгерілету кеңесінің төрағасы Рен Хунбин бұл CCPIT-дің Қытай Жаңа жылынан кейінгі алғашқы жиыны екенін атап өтті.
Біз алғашқы ел ретінде Қазақстанды таңдадық. Бұл Қытай тарапының Қытай мен Қазақстан арасындағы сауда-экономикалық тұрғыдан өзара іс-қимылға үлкен мән беретінін тағы бір рет көрсетеді. Сонымен қатар қазіргі уақытта біздің ынтымақтастығымызды жоғары деңгейде ілгерілетіп жатқанымызды толық дәлелдеп отыр. Қытай мен Қазақстан тату көрші, жақсы дос, жақсы серіктес. 2013 жылы ҚХР Төрағасы Си Цзиньпин алғаш рет Қазақстанда экономикалық Жібек жолын салу бастамасын көтерді. Міне, осы сәттен бастап елдеріміз арасындағы сауда-экономикалық ынтымақтастық құрылысының тамаша тарауы басталды. Біз сондай-ақ “Атамекен” ҰКП, “Самұрық-Қазына” қорымен және Қазақстанның Сыртқы сауда палатасымен жемісті ынтымақтастық жүргіземіз, - деді ол.
Фото: Тимур Раев
Рен Хунбин әртүрлі платформаларда Қазақстан мен Қытайдың өзара серіктестігін белсенді түрде дамытып жатқанын айтты.
Сөзінше, Бейжіңде биыл Қытай-Қазақстан іскерлік кеңесі өтеді. Қазір оған қызу дайындық жүріп жатыр.
Біз Қытай мен Қазақстан арасындағы өзара іс-қимылды кеңейтуге, өзара іс-қимылымызды сапалы түрде ілгерілетіп, тереңдетуге және жаңа нәтижелерге қол жеткізу үшін бар күш-жігерімізді саламыз. Бізге сауда-экономикалық серіктестігіміздің әреуетін кеңейтіп, тереңдету керек. Қытай - Қазақстанның басты сауда-экономикалық және инвестициялық серіктестерінің бірі, - дейді Рен Хунбин.
Қазақстан мен Қытайдың жалпы сауда айналымы 43 млрд доллардан асады.
Фото: Тимур Раев
Қазақстан Орталық Азиядағы инвестиция салынған ең үлкен ел. Жалпы көлемі 700 млн доллар инвестиция құйдық. Десе де бұл көлем бір орында тұрған жоқ. Қазірдің өзінде Қазақстанда Жаңатаста жоба іске асырылып жатыр, Шымкенттегі мұнай өңдеу зауыты және т.б. маңызды жобалар бар. Бұл жобаның барлығы тұрақты түрде дамып, халыққа өз пайдасын әкеліп, елдің әлеуметтік-экономикалық дамуына үлесін қосып жатыр, - деді Қытайдың халықаралық сауданы ілгерілету кеңесінің төрағасы.
Ол CCPIT елімізде энергетика, технология, авиация, цифрлы экономика және басқа да көптеген салада серіктестікті дамытуға дайын екенін жеткізді.
“Атамекен” ҰКП Президиумының төрағасы Райымбек Баталов Қазақстан-Қытай сауда-экономикалық байланысы көп жылдан бері дамып келе жатқанын айтты.
Фото: Тимур Раев
Қазақстан мен Қытай арасындағы көпжылдық тиімді серіктестікті өзара сенімге, әріптестікке және ортақ өркендеуге деген ұмтылысқа негізделген. Қазақстанның сауда-экономикалық және инвестициялық саясаты Қытаймен ынтымақтастықты күшейтуге ерекше мән береді. Әсіресе, жаңартылатын энергия, көлік және логистика, электронды сауда, туризм, ауыл шаруашылығы, өнеркәсіп және астықты терең өңдеу салалары басым бағыттар, - деп айтты Баталов форумда.
Оның сөзінше, “Атамекен” Ұлттық кәсіпкерлер палатасы екіжақты сауда-экономикалық байланыстарды нығайтуда негізгі рөл атқарады.
Фото: Тимур Раев
Біз отандық бизнесті белсенді қолдап, қазақстандық компаниялардың халықаралық нарықтарға, оның ішінде Қытай нарығына шығуына ықпал етеміз. Бүгінде Қазақстан жаһандық экономикалық процестерде маңызды орын алып, сенімді серіктес және “Бір белдеу, бір жол” бастамасының негізгі қатысушысы ретінде әрекет етіп келеді. Біз шетелдік инвесторларға барынша қолайлы жағдай жасауды мақсат тұтып, ашықтықты, тұрақтылықты және мемлекеттік қолдау шараларын қамтамасыз етеміз, - деп атап өтті Райымбек Баталов.
Ол 2025 жылғы маусымда “Қытай + Орталық Азия” мемлекет басшылары саммиті қарсаңында, CCPIT-пен бірлесіп “Қытай + Орталық Азия” іскерлік кеңесінің екінші отырысын өткізу жоспарда бар екеніне назар аударды.
Қытайдың Қазақстандағы Төтенше және өкілетті елшісі Хань Чуньлинь елдеріміз арасындағы байланыс нығайып келе жатқанына тоқталды.
Фото: Тимур Раев
Қазақстан “Бір белдеу, бір жол” бастамасы алғаш рет ұсынылған жер. Сондай-ақ Қазақстан Қытайдың жақсы досы мен серіктесі. Дипломатиялық байланыстар орнатылғалы 33 жыл ішінде елдеріміз өзара сенім мен серіктестіктің ең жоғары деңгейіне өтті, - деді елші.
Хань Чуньлинь 2024 жылы елдеріміз арасындағы сауда айналымы 8%-ға өсіп, Қытай Қазақстанның ең ірі инвестициялық серіктестерінің біріне айналғанын айтты.
Фото: Тимур Раев
Біз қазірдің өзінде өзара байланысты логистиканың жүйелі жүйесін құрдық. Біз мұны сондай-ақ Қытай мен Еуропа арасындағы контейнерлік тасымал аясында да көріп отырмыз, біз өзара әрекеттестіктің осы бағытын тұрақты дамыту және оған үлес қосу үшін осы бағытты белсенді түрде дамытып жатырмыз. Қытай біздің елдеріміз арасындағы сауда-экономикалық қарым-қатынастардың ұтымды өсуін қолдау үшін энергетикалық секторда, агроөнеркәсіптік секторда, электронды коммерцияны және цифрлық экономиканы дамытуда Қазақстан мен Қытай компанияларының ынтымақтастығын ілгерілету үшін Қазақстанмен жұмыс істеуге дайын, - деп айтты дипломат.
Фото: Тимур Раев
Бүгінгі форумның аясында 8 меморандумға қол қойылды.
