Қазақстанның Өзбекстандағы Елшісі Бейбіт Атамқұлов Өзбекстан Республикасының Ауыл шаруашылығы министрі Иброхим Абдурахмановпен кездесті, деп хабарлайды DKnews.kz.
Кездесу барысында 2024 жылғы ауыл шаруашылығы саласындағы екіжақты ынтымақтастықтың қорытындысы, сондай-ақ 2025 жылға арналған іс-шаралар күнтізбесі қаралды.
Тараптар 2024 жылы Өзбекстан Республикасының Президенті Шавкат Мирзиёевтың Қазақстан Республикасына мемлекеттік сапары барысында қол жеткізілген Жоғары мемлекетаралық кеңестің шешімдері мен практикалық іс-шаралар жоспарының жобаларын іске асыру мәселелерін талқылады.
Сұхбат барысында өсімдік селекциясы, тұқым шаруашылығы, топырақтану және суды үнемді пайдалану салаларында ауыл шаруашылығы саласындағы ғылыми-зерттеу институттары арасындағы өзара іс-қимылды кеңейту қажеттілігі аталып өтті.
Кездесу қорытындысы бойынша ауыл шаруашылығы саласындағы екіжақты қатынастарды одан әрі нығайту және ынтымақтастықты жалғастыруға деген дайындық расталды.
2024 жылы өзара сауда көлемі 4,1 млрд АҚШ долларын құрады, оның ішінде ауыл шаруашылығы өнімдері 1,66 млрд АҚШ долларын құрады (Қазақстаннан Өзбекстанға экспорт – 1,41 млрд АҚШ доллары, Өзбекстаннан Қазақстанға импорт – 250 млн АҚШ доллары).
