Астанада ҚР Сауда және интеграция министрі Арман Шаққалиев Экономикалық ынтымақтастық және даму ұйымының (ЭЫДҰ) Ғаламдық байланыстар хатшылығының Еуразия бөлімінің басшысы Уильям Томпсонмен кездесті, деп хабарлайды DKnews.kz.
Тараптар екіжақты ынтымақтастықтың негізгі аспектілерін және одан әрі серіктестік перспективаларын талқылады. Арман Шаққалиев ЭЫДҰ-ға Қазақстанның сауда интеграциясын дамытуға, бәсекеге қабілеттілікті арттыруға және тұрақты экономикалық өсуге бағытталған бастамаларын қолдағаны үшін алғыс білдірді.
Шаққалиев Сауда және интеграция министрлігі ЭЫДҰ стандарттарына бейімделіп, сауда рәсімдерін жеңілдету индексі, қызмет көрсету саудасының шектеулілігі индексі, экспорттық-несиелік агенттіктер бойынша жұмыс топтары және QazTrade белсенді қатысатын Еуразиялық бәсекеге қабілеттілік бағдарламасы сияқты стратегиялық маңызды бастамалар арқылы үздік халықаралық тәжірибелерді енгізетінін атап өтті. Кездесу барысында тараптар Транскаспий халықаралық көлік бағдарының (ТХКБ) дамуына және ЕО-ның «ТХКБ бәсекеге қабілеттілігін арттыру» жобасын іске асыруға ерекше назар аударды.
Қазақстан логистикалық инфрақұрылымды жетілдіруді және бұл бағытты отандық экспорттаушылардың пайдалануын ынталандыруды жалғастыруда. 2024 жылы ТХКБ бойынша тасымал көлемі 4,5 млн тоннаға жетіп, 2023 жылмен салыстырғанда 62%-ға өсті, ал контейнерлік тасымалдар 2,7 есеге артып, 56,5 мың ЖФЭ (жиырма футтық эквивалент) құрады. Қытай – Еуропа бағыты бойынша 35,6 мың ЖФЭ тасымалданды, бұл өткен жылмен салыстырғанда 27 есеге көп. Ал 2025 жылға 5,2 млн тонна, оның ішінде 70 мың ЖФЭ контейнерлік тасымалға жеткізу жоспарланып отыр.
Болашақтағы ынтымақтастық перспективалары да басты назарда. Атап айтқанда, 2025 жылдың 13-і наурызында Астанада өтетін маңызды шикізат материалдары бойынша семинармен қоса, алдағы іс-шаралар талқыланды. Сонымен қатар, Уильям Томпсон министрді 2025 жылғы 10 сәуірде Стамбулда өтетін «Emerging Market Economy» форумына қатысуға шақырды. Кездесу қорытындысы бойынша тараптар сауда-экономикалық ынтымақтастықты одан әрі нығайтуға және ЭЫДҰ аясында өзара іс-қимылды жалғастыруға дайын екендіктерін растады.
