2025 жылғы Mobile World Congress (MWC) Shanghai көрмесінде Huawei ұйымдастырған Мобильді жасанды интеллект (Mobile AI Summit) саммиті технологиялық көктемнің ең жарқын алаңдарының біріне айналды. Байланыс операторлары, ЖИ әзірлеушілері, зерттеушілер мен сала көшбасшылары болашақ мобильді ЖИ қандай негізге сүйенуі тиіс деген тақырыпта ашық әрі терең пікір алмасты. Негізгі қорытындылар да анық айтылды: 5G-A технологиясының жоғарғы арнасы (uplink) жетілдірілмей және желі мен қызмет синергиясы орнамайынша, ЖИ-тәжірибені шынайы түрде монетизациялау мүмкін емес.
Бұдан бөлек, саммит қатысушылары GSMA Foundry бастамасымен іске қосылған Mobile Network for Thriving AI атты жаңа ауқымды жобаның басталуына куә болды. Бұл — сала енді тек сынақтар мен пилоттар кезеңінен шығып, қолданушы тәжірибесінен нақты пайда табуға көшкенінің айқын белгісі.
ЖИ мен 5G-A: үзілмес технологиялық серіктестік
Саммитті ашқан Қытай байланыс стандарттары қауымдастығының (CCSA) президенті Вэнь Ку былай деді:
«5G-A мен ЖИ-ді біріктіру — бұл жай ғана тренд емес. Бұл – бүкіл коммуникациялық инфрақұрылымның эволюциялық бағыты. Біз стандарттар әзірлеуді жылдамдатып, желілік архитектураға интеллектуалдық шешімдерді енгізіп, серіктестік экожүйелерін құруымыз қажет».
Бүгінгі таңда мобильді ЖИ экранмен шектелген өзара әрекеттестік аясынан шығып, дыбыс, бейне, кеңістіктік тану секілді мультимодальды интерфейстерге өтіп жатыр. Саммитке қатысқан Rokid, MiniMax және Unitree Robotics компаниялары өздерінің ЖИ өнімдерінің қалай жетіліп жатқаны туралы бөлісті. Аудио мен бейнені беру сапасы артып, модель дәлдігі күшейіп, ал 5G-A желісінің арқасында жауап беру уақыты барынша қысқарды. Бұл — ЖИ бейнеқоңыраулары немесе нақты уақыттағы көмекшілер сияқты қызметтерді іске асырудың негізі. Алайда мұның бәрі кем дегенде 20 Мбит/с болатын жоғарғы жылдамдықты байланыс арнасын талап етеді.
ЖИ ережелерді өзгертуде: желілер, бизнес және клиенттік тәжірибе
Саммит барысында өз тәжірибесімен Қытай инженерлік академиясының шетелдік мүшесі және IEEE Fellow мәртебесіне ие академик Чжи-Куань Ло, сондай-ақ телеком-операторлар мен Ookla сарапшылары бөлісті. Барлығы бір ауыздан мойындады: ЖИ желілерді жобалау мен пайдаланушыларға қызмет көрсету тәсілін түбегейлі өзгертіп жатыр.
Операторлар енді тек байланыс арнасын ғана емес, жекелендірілген салалық шешімдерді ұсына бастады. Бұл — автоматтандыру, болжамдық аналитика және бейімделгіш басқарудың арқасында мүмкін болып отыр.
Саладағы тағы бір маңызды өзгеріс — табыс табу тәсілінің өзгеруі. Бұрынғыдай тек трафик сатумен шектелмей, операторлар цифрлық қызметтер мен тәжірибені монетизациялауға көшіп жатыр. Бұл ретте жоғарғы арнаның жылдамдығы, кідіріс уақыты және тұрақтылық желінің ЖИ-ге дайындығын анықтайтын негізгі үш факторға айналды.
Huawei-дің GigaBand шешімі: ақылды және икемді желілердің іргетасы
Huawei жаһандық технологиялық трендтерге жауап ретінде GigaBand шешімдер жиынтығын ұсынды. Бұл — желілік ресурстарды біріктіруге (AIR pooling) және интеллектуалды басқаруға (Optsolver) негізделген технология. Оның көмегімен операторлар дәстүрлі 5G желісінен 5G-A деңгейіне жеңіл өтеді, әрі стриминг, бұлтты ойындар, ЖИ көмекшілер сияқты әртүрлі сценарийлерді қолдай алады.
Атап өтерлік мысал — Гонконгтағы жоба: мұнда GigaBand енгізілуінің арқасында 4G және 5G жиілік ресурстары бір мезгілде, қызмет түріне қарай пайдаланылады. Нәтижесінде 5G өткізу қабілеті 2,28 есе артқан, ал 4G пайдаланушылары ешқандай нашарлауды байқамаған. Бұл — тек жылдамдықтың өсуі ғана емес, желілердің тиімділігі, икемділігі мен экологиялық тұрақтылығының жаңа деңгейі.
Мобильді ЖИ — цифрлық өмірдің жаңа қозғаушы күші
Саммит қорытындылары анық: 5G-A мен GigaBand технологиялары және ЖИ-дің терең экожүйелік интеграциясы — келесі цифрлық дәуірдің негізі. Бұл тек бизнесті емес, күнделікті өмірімізді де өзгертеді: ақылды құрылғылар, дауыс көмекшілері, кідіріссіз бейнебайланыс, ЖИ негізіндегі қызметтер — бәрі бұрынғыдан да жақын.
Және бұл болашаққа апарар жолды Huawei мен оның серіктестері дәл қазір салып жатыр.
MWC Shanghai 2025: болашақты қалыптастырған оқиға
18–20 маусым аралығында өткен MWC Shanghai 2025 көрмесі тағы бір мәрте дәлелдеді: байланыс, ЖИ және цифрландыру салаларының болашағы Азияда қалыптасып жатыр. Huawei көрмеде өз инновациялық өнімдері мен шешімдерін Shanghai New International Expo Center (SNIEC) орталығының N1 павильонында таныстырды, әрі технологиялық трансформацияның көшбасшысы ретіндегі мәртебесін нақтылап берді.
2025 жылы 5G-Advanced технологиясын коммерциялық енгізу қарқыны рекордтық деңгейге жетті. Huawei бүкіл әлемдегі операторлармен, сарапшылармен және зерттеу орталықтарымен тығыз ынтымақтастықта жұмыс істеп жатыр. Мақсат — ЖИ-дің телеком-сервистерді тек жаңартумен шектелмей, жаңа табыс көздерін ашуға және шынайы интеллектуалды әлем құруға жол ашатынын көрсету.
