Премьер-министр Олжас Бектенов үстел теннисінен ҚР Президентінің кубогына арналған халықаралық турнирді ашты, деп хабарлайды DKNews.kz.
Премьер-министр Олжас Бектенов үстел теннисінен Қазақстан Республикасы Президентінің кубогына арналған халықаралық турнирдің ашылу салтанатына қатысты.
Өз сөзінде ол бұқаралық спортты дамытуға және осы бағытта жүргізіліп жатқан жұмыстарға назар аудартты.
«Мемлекет Басшысы Қасым-Жомарт Кемелұлы Тоқаев бұқаралық спортты дамытуға ерекше көңіл бөледі. Үстел теннисі бұқаралық спорт қозғалысын қалыптастыруға және саламатты өмір салтын насихаттауға елеулі үлес қосады» Олжас Бектенов
Қазақстанда бүгінде 260 мыңнан астам адам үстел теннисімен тұрақты түрде айналысады. Ал салада 10 мыңнан астам кәсіби спортшы және 400-ге жуық жаттықтырушы жұмыс істейді.
Бүкіл республика бойынша 20 өңірлік федерация бар, 12 заманауи үстел теннисі орталығы, 30 жаңа бөлімше және 35 мамандандырылған зал ашылған.
Қазақстандық спортшылар халықаралық ареналарда табысты өнер көрсетуде. Соңғы екі жылда олар 85 медаль жеңіп алды, оның ішінде 31-і алтын алқа. Олардың арасынан Олимпиада ойындарының қатысушысы Кирилл Герасименконы, жастар арасындағы әлем чемпионы Алан Құрманғалиевті, халықаралық турнирлердің жеңімпаздары Зәуреш Акашева және Сарвиноз Миркадироваларды ерекше атай кету керек.
2023 жылы Астанада алғаш рет үстел теннисінен Азия чемпионаты өткен болатын. Енді 2027 жылы Қазақстанда әлем чемпионатын өткізу жоспарланып отыр.
Премьер-министр Президент Кубогына арнап турнир өткізу отандық спортты әлемдік деңгейге көтеру мақсатындағы маңызды қадам екенін және мұнда Қазақстан мен шет елдердің мықты теннисшілері бас қосатынын атап өтті.
Ашылу салтанатында Халықаралық үстел теннисі федерациясының бас хатшысы Рауль Калин де сөз сөйледі. Ол Қазақстанның тәуелсіздік жылдарындағы дамуына және елдің спортты дамытуға қосқан үлесіне оң баға берді, сондай-ақ Президент Қасым-Жомарт Тоқаевқа үстел теннисіне қолдау көрсетіп келе жатқаны үшін алғысын білдірді.
Қазақстан Республикасы Президентінің ашық кубогы 25-29 қазан аралығында өтеді. Жарысқа Қазақстанды қосқанда 14 елден келген 300-ден астам спортшы қатысуда. Ойыншылар арасында Оңтүстік Корея, Қытай, Мажарстан, Мысыр, Малайзия, Иран, Сауд Арабиясы және тағы да басқа мемлекеттердің өкілдері бар. Әлемдік ITTF рейтингінің топ-100 құрамына кіретін спортшылардың қатысуы бұл турнирдің халықаралық ауқымын көрсетеді. Турнир төрт жас санатында, жеке және командалық есепте өтіп жатыр: U-11 – 2014 жылы туғандар және одан кіші, U-16 – 2009 жылы туғандар және одан кіші, Open 17+ – 2008 жылы туғандар және одан жоғары, team event – командалық сайыс. Кубоктың басты оқиғаларының бірі үстел теннисінің әлемдік жұлдыздарының қатысуымен өтетін шоу-матч болмақ. Турнирдің барлық күндерінде кіру тегін.
