Ыстанбұлдағы Абай Құнанбайұлы атындағы мектепте Қазақстан Республикасының күні аталып өтті, деп хабарлайды DKNews.kz.
Қазақстан Республикасының ең маңызды мемлекеттік мерекелерінің бірі – Республика күніне орай Ыстанбұлдағы Абай Құнанбайұлы атындағы мектепте еліміздің мемлекеттік егемендігі туралы Декларацияның қабылданғанына 35 жыл толуына арналған салтанатты іс-шара өтті. Бұл күн – тәуелсіздік пен мемлекеттіліктің бастауы болған тарихи кезеңді еске түсіретін ерекше мереке.
Іс-шараға Ыстанбұл қаласының билік өкілдері, мектеп басшылығы және Қазақстан Республикасының Ыстанбұл қаласындағы Бас консулы қатысты. Салтанатты жиында Бас консул өз сөзінде Республика күні әрбір қазақстандық үшін айрықша маңызға ие екенін, бұл күн елдің тәуелсіздікке жету жолындағы тарихи белестерін еске салатынын атап өтті. Сондай-ақ ол мектеп басшылығына қазақ мәдениетіне деген құрметі мен Қазақстан мен Түркия арасындағы достық байланыстарды қолдағаны үшін ризашылығын білдірді.
Абай Құнанбайұлы атындағы бұл мектепте Түркия азаматтары білім алады. Оқу ордасы шетелде қазақ тілі мен мәдениетін ілгерілетуде маңызды рөл атқарады. Мұнда оқушылар ұлы ақын және ойшыл Абайдың бай рухани мұрасымен, қазақ халқының тарихы, әдебиеті мен дәстүрлерімен танысады. Осындай мәдени-ағартушылық бастамалар халықтар арасындағы өзара түсіністік пен достықты нығайта түседі.
Мерекелік бағдарлама аясында оқушылар Абай Құнанбайұлының, Міржақып Дулатовтың және басқа да қазақ классиктерінің өлеңдерін мәнерлеп оқып, қазақ мәдениетіне деген терең құрмет пен ықыласын көрсетті. Балалардың әсерлі өнер көрсетуі қонақтардың зор ықыласына бөленіп, Республика күні идеяларының жас ұрпақ жүрегінен орын тапқанын айқындады.
Салтанатты іс-шара Қазақстан мен Түркия халықтарының достығы мен өзара сыйластығын паш еткен әндермен аяқталды. Абай Құнанбайұлы атындағы мектептегі бұл шара Республика күнінің тек қазақстандықтар үшін ғана емес, сонымен қатар еліміздің бейбітшілік пен достық рухын бөлісетін барша бауырлас халықтар үшін де ортақ мереке екенін тағы бір мәрте дәлелдеді.
