Алматы қаласындағы Назарбаев Зияткерлік мектебі – Алматы–Наурызбай базасында Қазақстанның білім беру кеңістігіндегі ең ірі оқушылар конференцияларының бірі – MUNIX 2026 (Model United Nations of Intellectual Exchange) өтті. Екі күнге созылған іс-шара еліміздің түкпір-түкпірінен келген 250 оқушыны, жас көшбасшылар мен пікірталасқа құштар жастарды бір алаңға тоғыстырды, деп хабарлайды DKNews.kz.
Конференцияға Назарбаев Зияткерлік мектептерінің 16 филиалынан, сондай-ақ еліміздің жалпы білім беретін мектептерінен келген оқушылар қатысты. MUNIX 2026 жас қатысушылар үшін тек пікірталас алаңы ғана емес, халықаралық дипломатия мен жаһандық саясаттың қыр-сырын тәжірибе жүзінде меңгеруге мүмкіндік берген маңызды білім беру алаңы болды.
Жаһандық мәселелер – жастар көзқарасымен
Конференция аясында өткен комитет отырыстарында қатысушылар халықаралық терроризм, балалар аштығы, қарулы қақтығыстар, мұхиттардың ластануы, экологиялық қауіптер сияқты әлемдік деңгейдегі өзекті мәселелерді талқылады.
Оқушылар әртүрлі мемлекеттердің делегаттары рөлінде сөз сөйлеп, өз ұстанымдарын қорғады, келіссөздер жүргізді және нақты дипломатиялық, саяси шешімдер ұсынды. Model United Nations форматы олардың сыни ойлауын, көпшілік алдында сөйлеу қабілетін және командалық жұмыс дағдыларын дамытуға жол ашты.
Идеядан дәстүрге айналған жоба
MUNIX 2026 — бір реттік бастама емес. Бұл жоба 2025 жылғы 22–23 наурызда өткен алғашқы конференциядан бастау алады. Сол кезде зияткерлік алмасу идеясы LEGACY (Назарбаев Зияткерлік мектебі – Алматы–Наурызбай) және QYRAN (Назарбаев Зияткерлік мектебі – Қызылорда) MUN-клубтарының бірлескен еңбегінің арқасында жүзеге асқан еді.
Алғашқы жылы-ақ конференция Қазақстанның 14 қаласынан 200-ден астам оқушыны жинап, жастардың жаһандық күн тәртібіне деген қызығушылығы жоғары екенін көрсетті.
Серіктестер қолдауы және кеңейген ауқым
MUNIX-тің табысты бастамасы ірі серіктестердің назарын аударды. MUNIX 2025 конференциясы Қазақстандағы БҰҰ өкілдерінің, Saya Education мектебінің негізін қалаушының, сондай-ақ IELTS емтиханынан 9.0 балл алған алғашқы қазақстандық – Сая Кидиралидің қолдауына ие болды.
2026 жылы конференция қатысушылар саны бойынша жаңа рекорд орнатып қана қоймай, серіктестер қатарын да кеңейтті. Олардың арасында Қазақстандағы БҰҰ өкілдері, IDP IELTS Kazakhstan, Saya Education және Италия университеттеріне түсуге маманданған Theoria Edu компаниясы бар.
MUNIX-ті ұйымдастырған кім
MUNIX 2025 және 2026 конференцияларының бас ұйымдастырушысы – Назарбаев Зияткерлік мектебі – Алматы–Наурызбай оқушысы, осы мектептегі LEGACY MUN-клубының жетекшісі Амантай Ақниет. Оның жетекшілігімен конференция мазмұны мен ұйымдастыру деңгейі кәсіби деңгейге көтерілді.
MUNIX 2026 аясында үш тілде жұмыс істеген 9 комитет болды. Екі күндік пікірталас қорытындысы бойынша үздік делегация атағын Назарбаев Зияткерлік мектебі – Шымкент–Абай командасы, ACE MUN-клубының мүшелері жеңіп алды. Олар ең көп жеке номинацияларға ие болды.
Өткен жылғы жеңімпаздар – Назарбаев Зияткерлік мектебі – Талдықорған, AMITY MUN-клубының өкілдері MUNIX кубогын жаңа жеңімпаздарға салтанатты түрде табыстап, конференцияның дәстүрлі жалғастығын көрсетті.
Жаңа буын көшбасшыларының алаңы
Бүгінде MUNIX — жай ғана мектеп конференциясы емес. Бұл — Қазақстанда жаһандық ойлай алатын, жауапкершілігі жоғары, пікірін дәлелмен жеткізе білетін жаңа буын дипломаттар мен көшбасшылардың қалыптасып келе жатқанын айқын көрсететін жоба.
MUNIX жыл сайын өтетін дәстүрге айналып, еліміздің түкпір-түкпірінен келген жүздеген ынталы оқушыны біріктіруде. Бұл алаң жастарға өз ойын ашық айтуға, тыңдалуға және әлемдік мәселелерге бейжай қарамауға мүмкіндік береді.
