Президенттің тапсырмасымен Қазақстан Республикасының Премьер-Министрінің орынбасары – Жасанды интеллект және цифрлық даму министрі Жаслан Мәдиев бастаған қазақстандық делегация World Government Summit 2026 саммитіне қатысты. Әлемдік деңгейдегі бұл алаңда Қазақстан өзінің басты стратегиялық мақсатын айқын көрсетті – елде есептеу қуаты мен деректерді өңдеудің жаһандық хабын қалыптастыру, деп хабарлайды DKNews.kz.
Энергиядан – есептеуге
Саммит аясында Қазақстан өзін энергетикалық әлеуеті тікелей есептеу қуатына айналатын мемлекет ретінде таныстырды. Бұл – бүгінгі ЖИ дәуіріндегі шешуші фактор. Делегация ЖИ-экожүйесін қалыптастырудың барлық кезеңдерін қамтитын келіссөздер өткізді: энергия, дата-орталықтар, нейрожелілерді оқыту, инвестиция және қолданбалы шешімдер.
AI-фабрикалар және деректер инфрақұрылымы
Кездесулердің негізгі бағыты жоғары өнімді деректерді өңдеу орталықтарын және «AI-фабрикаларды» құруға арналды. G42 холдингінің басшысы шейх Тахнун бин Заед Әл Нахайянмен өткен диалог деректерді сақтау мен өңдеу инфрақұрылымын дамыту бойынша нақты қадамдарды белгілеуге мүмкіндік берді.
Шейх Тахнун – жаһандық ЖИ күн тәртібіндегі ең ықпалды тұлғалардың бірі. Ол ірі дата-орталықтардан бастап, әлемдік технологиялық көшбасшылармен серіктестікке дейінгі жобаларға миллиардтаған инвестиция бағыттап келеді. Бұл тәжірибе Қазақстан үшін де стратегиялық маңызға ие.
Төмен көміртекті дата-орталықтар
БАӘ-нің энергетика және инфрақұрылым министрі Сухейль Мохамед Әл-Мазруимен өткен кездесуде энергия үнемдейтін, төмен көміртекті дата-орталықтар құру мәселелері талқыланды. Әл-Мазруи жасанды интеллектіні алғашқылардың бірі болып мұнаймен салыстырып, энергияны емес, таза энергияға негізделген дайын «есептеу қуатын» сататын модельді ілгерілетіп келеді.
Мемлекетаралық әріптестік күшейді
Сапардың маңызды нәтижелерінің бірі – мемлекетаралық әріптестіктің нығаюы. БАӘ Министрлер Кабинетімен өзара түсіністік туралы меморандумға қол қойылып, цифрлық күн тәртібін үйлестіру мақсатында бірқатар жоғары деңгейдегі кездесулер өтті. Сонымен қатар, саммит алаңында Эстония Президентімен және Өзбекстан Президентінің кеңесшісімен диалог жүргізілді. Бұл – Қазақстанның өңірлік және жаһандық деңгейдегі байланыстарының кеңейіп келе жатқанын көрсетеді.
Технология, инвестиция және венчур
«ЖИ-хабы» стратегиясын іске асыру үшін технологиялық және инвестициялық сектор көшбасшыларымен келіссөздер өтті. Күрделі нейрожелілерді оқытуға арналған архитектуралар, «ДӨО алқабын» ауқымдау, гибридті бұлтты шешімдер, қаржы және төлем жүйелеріне ЖИ енгізу – барлығы нақты практикалық бағытта талқыланды.
Капитал тарту мәселелері ірі инвестициялық қорлармен қарастырылды. Венчурлық экожүйені дамыту тақырыбы да ерекше назарда болды. Бұл Қазақстанның тек инфрақұрылым құрып қана қоймай, стартаптар мен инновациялар үшін экожүйе қалыптастыруға ұмтылысын айқын көрсетті.
Болашақ экономикасының жаңа бағыттары
RTA және Мұхаммед бин Рашид атындағы ғарыш орталығымен өткен келіссөздер «төмен биіктіктегі экономика» мен ұшқышсыз логистиканы дамытуға жол ашты. Бұл – көлік, логистика және қалалық инфрақұрылымның болашағына тікелей әсер ететін бағыттар.
Қазақстан – жаңа технологиялық картада
World Government Summit 2026 болашақтың келбетін айқындайтын ықпалды тұлғаларды біріктірді. Қазақстан үшін бұл алаңға қатысу – имидждік қадам ғана емес, елдің жаңа технологиялық әлем картасындағы өршіл әрі болашағы зор ойыншы екенін нақты дәлелдеу болды.
Энергия, есептеу қуаты және жасанды интеллект – Қазақстан алдағы онжылдықтағы экономикалық өсімнің негізі ретінде осы үш бағытқа жүйелі түрде ставка жасап отыр. Саммит қорытындысы бұл сигналдың халықаралық деңгейде қабылданғанын көрсетті.
