Қазақстанның Словакиядағы Елшісі Жанна Сағынова Жилина өлкесінің Сауда-өнеркәсіп палатасының басшылығымен – директор Павол Витекпен және басқарма мүшесі Ян Мишурамен, сондай-ақ «AZC Group» компаниясының иесі Ян Саболмен бірқатар кездесулер өткізді, деп хабарлайды DKNews.kz.
Келіссөздер барысында екі ел арасындағы сауда-экономикалық байланыстарды кеңейту және инвестициялық ынтымақтастықты дамыту мәселелері талқыланды.
Сауда-экономикалық әріптестікті кеңейтуге назар аударылды
Елші словакиялық іскер топ өкілдеріне Қазақстанның экономикалық және инвестициялық әлеуеті туралы жан-жақты ақпарат беріп, отандық нарықтың мүмкіндіктерін таныстырды.
Тараптар өнеркәсіп, ауыл шаруашылығы, көлік және логистика, ақпараттық технологиялар, туризм және білім беру салаларында бірлескен жобаларды дамытуға үлкен әлеует бар екенін атап өтті.
Өңіраралық байланыстарды дамытуға басымдық берілді
Жилина өлкесінің Сауда-өнеркәсіп палатасының басшылығымен өткен кездесуде өңіраралық іскерлік, мәдени-білім беру және туристік байланыстарды нығайту бағыттары қарастырылды.
Палата өкілдері қазақстандық серіктестермен ынтымақтастық орнатуға қызығушылық білдіріп, Қазақстаннан келетін бизнес-миссияны қабылдауға дайын екендерін растады.
Бірлескен жобаларды іске асыру мүмкіндіктері талқыланды
«AZC Group» компаниясының иесі Ян Саболмен өткен кездесуде өзара қызығушылық тудыратын экономикалық салалардағы бірлескен жобаларды іске асыру перспективалары қаралды.
Жилина өңірінің сауда-өнеркәсіп палатасы Словакиядағы ең ірі өңірлік ұйымдардың бірі саналады. Өңір индустрияландыру деңгейінің жоғарылығымен ерекшеленеді, ал машина жасау саласы экономикасының негізгі тірек бағыттарының бірі болып табылады.
AZC Group халықаралық нарықтардағы позициясын күшейтуде
«AZC Group» компаниялар тобының құрамына Орталық Еуропадағы ондаған кәсіпорын кіреді. Соңғы жылдары топ Үндістан, Бразилия және Азия елдері нарықтарындағы қызметін белсенді түрде кеңейтіп келеді.
2024 жылдың қорытындысы бойынша компаниялар тобының жалпы айналымы шамамен 4 миллиард еуроны құрады.
