Гендерлік теңдік, адам құқықтары, әділеттілік және жауапкершілік – Қазақстан Республикасындағы мемлекеттік саясат пен жүргізіліп жатқан реформалардың негізгі қағидаттарының бірі, деп хабарлайды DKNews.kz.
Бұл туралы Қазақстан делегациясы ЮНЕСКО-ға мүше мемлекеттер мен ұйым хатшылығының қатысуымен өткен жоғары деңгейдегі іс-шарада мәлімдеді. Кездесу Халықаралық әйелдер күніне және Нью-Йоркте өтіп жатқан БҰҰ Әйелдер мәртебесі жөніндегі комиссиясының 70-сессиясына арналды.
ЮНЕСКО гендерлік саясатқа назар аударды
Іс-шара барысында ЮНЕСКО Бас директоры Халед әл-Анани сөз сөйлеп, ұйымның білім беру, ғылым және мәдени саясат салаларында гендерлік теңдікті қамтамасыз ету бағытындағы жұмыстарын атап өтті.
Қазақстан тәжірибесі таныстырылды
Қазақстанның ЮНЕСКО жанындағы Тұрақты өкілі, Елші Асқар Абдрахманов қатысушыларды елдегі әйелдердің рөлін арттыруға бағытталған мемлекеттік саясат пен нақты нәтижелермен таныстырды.
Дипломат гендерлік теңдікті дамыту, әйелдердің қоғамдағы орнын нығайту және олардың әлеуметтік, саяси әрі экономикалық өмірге белсенді қатысуын кеңейту бойынша жүргізіліп жатқан жұмыстарға тоқталды.
Әйелдердің білім мен экономикадағы үлесі артқан
ЮНЕСКО мандаты аясында Қазақстанда әйелдердің білім беру, ғылым және инновация салаларына қатысуын кеңейтуге ерекше көңіл бөлінетіні айтылды.
Қазіргі таңда елдегі жоғары оқу орындары студенттерінің:
- 52,5 %-ы қыздар
- шағын және орта бизнестің 48 %-дан астамы әйелдерге тиесілі
- мемлекеттік қызметтегі әйелдердің үлесі 55,8 %
Сонымен қатар ғылыми-техникалық салаларда әйелдерді қолдау, цифрлық ортада және сот төрелігі жүйесінде кемсітушіліктің алдын алу бағытында бірқатар жобалар іске асырылып жатыр.
Қазақстан халықаралық бастамаларды қолдайды
Асқар Абдрахманов Қазақстан ЮНЕСКО-ның гендерлік теңдікке қатысты жаһандық басымдығын толық қолдайтынын атап өтті.
«Қазақстан ЮНЕСКО-ның гендерлік теңдікке қатысты жаһандық басымдығын толығымен қолдайды. Өз кезегінде, Алматыдағы Орталық Азия мен Ауғанстан үшін Орнықты даму мақсаттары бойынша БҰҰ Аймақтық орталығы, сондай-ақ ЮНЕСКО Кеңсесінің жобалары осы маңызды саладағы өңірлік диалог пен ынтымақтастық үшін тиімді платформа қызметін атқарады», – деді дипломат.
Сөз соңында Қазақстан халықаралық қауымдастықпен бірге гендерлік теңсіздікті жоюға бағытталған бастамаларды қолдауды жалғастыратынын растады.
