Қазақстанда жаңа Конституция жобасы бойынша өткен республикалық референдум нәтижесіне байланысты Мемлекет басшысы Қасым-Жомарт Тоқаевтың атына шет мемлекеттердің басшылары мен халықаралық ұйымдар жетекшілерінен құттықтау жеделхаттары келіп түсті, деп хабарлайды DKNews.kz.
Шетелдік көшбасшылар мен халықаралық ұйымдардың өкілдері референдум нәтижесін Қазақстандағы реформаларға көрсетілген қолдау ретінде бағалап, елдің одан әрі дамуына сенім білдірді.
Путин: реформалар кең қолдау тапты
Ресей Президенті Владимир Путин Қазақстандағы конституциялық өзгерістер екі ел арасындағы одақтастық қатынастар мен стратегиялық серіктестікті нығайтуға ықпал ететінін атап өтті.
«Жалпыхалықтық дауыс беру нәтижесі Сіздің мемлекеттік институттарды нығайту және елдің орнықты әлеуметтік-экономикалық ілгерілеуін қамтамасыз ету бағытындағы бастамаларыңыз кеңінен қолдау тапқанын толық растады», – деп жазылған жеделхатта.
Мирзиёев: реформалар ел дамуына серпін береді
Өзбекстан Президенті Шавкат Мирзиёев ауқымды саяси және әлеуметтік-экономикалық жаңғыру Қазақстанның тұрақты дамуына және халықаралық беделінің артуына ықпал ететініне сенім білдірді.
«Осы маңызды саяси науқанға азаматтардың белсенді қатысуынан, сондай-ақ референдум нәтижесінен Сіз жүргізіп жатқан реформаларды бауырлас елдің халқы жан-жақты қолдайтынын анық көреміз», – деп жазылған Өзбекстан басшысының жеделхатында.
Жапаров: бұл – тарихи оқиға
Қырғызстан Президенті Садыр Жапаров референдумның табысты өтуімен құттықтап, бұл оқиға Қазақстанның одан әрі өркендеуіне жол ашатынын айтты.
«Бұл тарихи уақиға еліңізді одан әрі өркендетіп, халықтың әл-ауқатын арттыру жолындағы маңызды қадам болатыны сөзсіз», – деп жазды Қырғызстан басшысы.
Басқа елдер мен ұйымдар да құттықтады
Қазақстан Президентіне құттықтау жеделхаттарын бірқатар ел басшылары мен халықаралық ұйым жетекшілері де жолдады.
Олардың қатарында:
- Әзербайжан Президенті Ильхам Әлиев
- Беларусь Президенті Александр Лукашенко
- Сербия Президенті Александр Вучич
- Армения Премьер-министрі Никол Пашинян
Сонымен қатар халықаралық ұйымдардың басшылары да құттықтау жолдады:
- Шанхай ынтымақтастық ұйымының бас хатшысы Нұрлан Ермекбаев
- ТМД бас хатшысы Сергей Лебедев
- Түркі мемлекеттері ұйымының бас хатшысы Кубанычбек Өмірәлиев
- ҰҚШҰ бас хатшысы Таалатбек Масадыков
- Экономикалық ынтымақтастық ұйымының бас хатшысы Асад Маджид Хан
- Жоғары Еуразиялық экономикалық кеңес төрағасы Бақытжан Сағынтаев
Қазақстандағы маңызды саяси оқиға
Сарапшылардың пікірінше, республикалық референдум Қазақстандағы саяси реформалардың жаңа кезеңін айқындайтын маңызды оқиға болды.
Шетелдік көшбасшылардың құттықтауы Қазақстанның халықаралық аренадағы рөлінің артып келе жатқанын және жүргізіліп жатқан реформалардың халықаралық деңгейде де назар аудартқанын көрсетеді.
Айта кетейік, Мемлекет басшысының атына құттықтау жеделхаттары әлі де келіп түсіп жатыр.
