Қазақстанға қытайлық туристердің қызығушылығы артып келеді. Бұл үрдісті күшейту үшін FlyArystan ерекше форматтағы жобаны қолға алды, деп хабарлайды DKNews.kz.
Әуекомпания Алматы қаласы мен Маңғыстау облысының туризм басқармаларымен бірлесіп, Қытайдағы танымал тревел-блогерлерді, туроператорлар мен туристік агенттік өкілдерін елімізге шақырды.
Басты мақсат – Қазақстанның табиғатын, мәдениетін және туристік мүмкіндіктерін Қытай аудиториясына олардың өз көзімен көрсету.
4–7 шілде аралығында қытайлық қонақтар екі бағытқа бөлініп саяхаттады. Бір топ Маңғыстау өңірінің ерекше табиғи және тарихи орындарын араласа, екінші топ Алматы мен оның маңындағы ең танымал туристік нысандармен танысты.
Маңғыстаудың таңғажайып табиғаты көрсетілді
Маңғыстауға барған делегация өңірдің ең көрікті жерлерін аралады. Бағдарламаға Жығылған мүйісі, Сұлтан Епе және Шақпақ ата жерасты мешіттері, Торыштағы шар тастар алқабы, Шерқала мен Айрақты таулары, Қызылқұп шатқалы және әлемге әйгілі Бозжыра үстірті кірді.
Бұл орындар соңғы жылдары Қазақстанның ең танымал туристік бағыттарының біріне айналып келеді. Әсіресе әлеуметтік желілердегі ерекше көріністері арқылы шетелдік саяхатшылардың назарын жиі аударады.
Алматының ең танымал бағыттары таныстырылды
Алматыға келген жеті қытайлық инфлюенсер бірнеше күн ішінде өңірдің табиғи, мәдени және гастрономиялық орындарын аралап шықты.
Олар Шымбұлақ тау курортына көтеріліп, Көктөбеде болды, Көлсай мен Қайыңды көлдерінің табиғатына тәнті болды. Сондай-ақ Шарын шатқалына барып, Huns этноауылы мен Bizdin Auyl кешенінде қазақтың дәстүрімен танысты. Бағдарлама Oi-Qaragai тау курорты мен Көк базардағы ұлттық тағамдар мен жергілікті атмосфераны тамашалаумен аяқталды.
Қазақстан туралы миллиондаған адам біледі
Жобаға қатысқан блогерлердің жалпы аудиториясы 13,5 миллионнан асады. Сапар кезінде түсірілген фото және бейнематериалдар алдағы уақытта Қытайдың ең ірі әлеуметтік платформалары – RedNote (Xiaohongshu), Douyin және Weibo желілерінде жарияланады.
Бұл Қазақстанның туристік әлеуетін дәстүрлі жарнамадан гөрі шынайы саяхат тәжірибесі арқылы көрсетуге мүмкіндік береді. Себебі қазіргі таңда көптеген турист жаңа бағытты таңдағанда дәл блогерлердің пікіріне сенім артады.
FlyArystan маркетинг және коммуникациялар жөніндегі директоры Жанар Жайлауова жобаның маңызын ерекше атап өтті.
«Қытай Қазақстан үшін негізгі кірме туристік нарықтардың бірі болып қала береді. Цифрлық контент авторларымен серіктестік шетелдік туристерге елімізге саяхаттаудың шынайы тәжірибесін көрсетіп, Қазақстанның танымалдылығын арттыруға және жаңа бағыттарға қызығушылық қалыптастыруға мүмкіндік береді. Блогерлердің жеке тәжірибесі мен шынайы әсерлері арқылы біз Маңғыстаудың ерекше табиғи ландшафттарынан бастап Алматының тау курорттарына дейінгі өңірлеріміздің сан қырлы мүмкіндіктерін таныстырамыз».
Қытаймен әуе байланысы кеңейіп келеді
Аталған блог-тур FlyArystan компаниясының Қазақстан мен Қытай арасындағы туристік және іскерлік байланысты дамытуға бағытталған жұмысының бір бөлігі.
Қазіргі таңда әуекомпания Алматы – Сиань, Астана – Үрімші, Ақтау – Үрімші және Алматы – Инин (Құлжа) бағыттары бойынша тұрақты тікелей рейстер орындайды. Бұл бағыттар екі ел арасындағы туристік ағынның артуына және Қазақстанның халықаралық туристік нарықтағы танымалдығын күшейтуге ықпал етеді.
Сарапшылардың пікірінше, бүгінгі таңда саяхатшылардың басым бөлігі жаңа бағыттарды дәл әлеуметтік желілер арқылы таңдайды. Сондықтан миллиондаған аудиториясы бар қытайлық инфлюенсерлердің Қазақстаннан бөлісетін әсерлері елдің туристік бренді үшін маңызды қадам болуы мүмкін.
