Қазақстан сирек және стратегиялық металдар саласындағы позициясын күшейтетін тағы бір маңызды қадам жасады, деп хабарлайды DKNews.kz.
Өнеркәсіп және құрылыс министрлігінде «Жезқазғансирекмет» АҚ мен Ұлыбританияның Maritime House Ltd. компаниясы арасында құрамында рений бар шикізатты қайта өңдеуге арналған ұзақ мерзімді офтейк-келісімшартқа қол қойылды.
Коммерциялық келісім бес жылға есептелген және оның жалпы құны 107 миллион АҚШ долларын құрайды.
Саранда жаңа өндіріс іске қосылады
Жоба Қарағанды облысының Саран қаласында жүзеге асырылады. Мұнда қайталама шикізаттан металл рений өндіретін жаңа кәсіпорын ашу жоспарланған.
Инвестиция көлемі 30 миллион долларды құрайды. Жоба іске қосылғаннан кейін өндірістің тұрақты жүктемесін қамтамасыз етуге мүмкіндік беретін ұзақ мерзімді әріптестік қалыптасады.
Келісімге қол қою рәсімі Қазақстан Республикасының Өнеркәсіп және құрылыс министрі Ерсайын Нағаспаевтың қатысуымен өтті.
Неліктен дәл рений маңызды?
Рений – әлемдегі ең сирек әрі жоғары технологиялық металдардың бірі. Ол авиациялық қозғалтқыштар өндірісінде, ғарыш өнеркәсібінде, энергетикада және мұнай-химия саласында кеңінен қолданылады.
Сарапшылардың пікірінше, мұндай металдарға жаһандық сұраныс жыл сайын артып келеді. Сондықтан оларды өндіру мен терең өңдеу көптеген мемлекет үшін стратегиялық бағытқа айналып отыр.
Қазақстан үшін бұл жоба тек жаңа өндіріс емес, сонымен қатар шикізатты экспорттаудан жоғары қосылған құны бар өнім шығаруға көшу жолындағы маңызды қадам саналады.
Экспорттық әлеуетті күшейтетін жоба
Министрліктің мәліметінше, мемлекет шикізатты терең өңдеуге, жаңа технологияларды енгізуге және жоғары технологиялық өндірістерді дамытуға бағытталған бастамаларды жүйелі түрде қолдап келеді.
Қол қойылған офтейк-келісім осы саясаттың нақты көрінісі саналады. Жоба Қазақстанның экспорттық мүмкіндігін кеңейтіп қана қоймай, елдің аса маңызды минералдар бойынша әлемдік нарықтағы орнын нығайтуға мүмкіндік береді.
Ұзақ мерзімді келісім өндірістің тұрақты жұмысын қамтамасыз етіп, қазақстандық сирек металдардың халықаралық нарыққа шығуына жаңа серпін береді.
