Астана осы аптада әлемнің ең дарынды жас бағдарламашылары мен зерттеушілерін біріктірген халықаралық алаңға айналды.
Қазақстан астанасында өтіп жатқан Жасанды интеллект бойынша III халықаралық олимпиаданың ашылуына Президент Қасым-Жомарт Тоқаев қатысып, цифрлық даму мен жасанды интеллект елдің болашағын айқындайтын басты бағыттардың бірі екенін мәлімдеді, деп хабарлайды DKNews.kz.
Қазақстан жасанды интеллектке неге ерекше мән беріп отыр?
Президент өз сөзінде Қазақстанның цифрлық трансформациядағы жетістіктеріне тоқталып, бұл бағыттың енді тек технологиялық емес, стратегиялық маңызға ие екенін айтты.
«Қазақстан Біріккен Ұлттар Ұйымының электронды үкіметті дамыту индексінде 193 мемлекеттің арасынан 24-орын алады. Жаңа технологияларды енгізуге әзірлік деңгейі бойынша еліміз Орталық Азияда көш бастап тұр. Біз бірыңғай инновациялық экожүйе құрып жатырмыз. Мұнда жасанды интеллект мемлекетті, экономиканы, бизнесті басқарудың маңызды тетігі ретінде қоғам өмірінің барлық саласына дендеп енеді».
Президенттің айтуынша, былтырғы Жолдауда Қазақстанды үш жылдың ішінде толық цифрлық мемлекетке айналдыру міндеті қойылған. Ал 2026 жылдың Цифрландыру және жасанды интеллект жылы болып жариялануы осы мақсатты жүзеге асырудың маңызды кезеңі саналады.
«Бұл – барлық үдерістің басы ғана», – деді Мемлекет басшысы.
Қазақстандық оқушылар әлемдік деңгейде нәтиже көрсетіп келеді
Қасым-Жомарт Тоқаев соңғы жылдары қазақстандық оқушылардың халықаралық білім сайыстарындағы жетістіктеріне арнайы тоқталды.
Өткен жылы Бейжіңде өткен Жасанды интеллект олимпиадасында еліміздің құрамасы үш алтын, бір күміс және үш қола медаль жеңіп алған. Президент мұны жастардың жоғары интеллектуалдық әлеуетінің дәлелі деп бағалады.
«Былтыр Бейжіңде өткен Жасанды интеллект бойынша олимпиададан Қазақстан оқушылары үш алтын, бір күміс және үш қола медаль жеңіп алды. Ел мерейін асыратын бұл жетістік жастарымыздың зияткерлік және шығармашылық әлеуетінің зор екенін көрсетеді. Орайлы сәтті пайдалана отырып, талантты өрендерімізге бағыт-бағдар беріп жүрген ұстаздар мен тәлімгерлерге алғыс айтамын», – деді Президент.
«Әлемді өзгертетін идеялар дәл осы жерде тууы мүмкін»
Мемлекет басшысы жасанды интеллекттің медицинадан бастап экологияға дейінгі көптеген саланың болашағын өзгертетін технология екенін атап өтті.
Оның пікірінше, бүгінгі олимпиада тек медаль сарапқа салатын жарыс емес, болашақ ғалымдар мен инженерлердің басын қосатын халықаралық интеллектуалдық алаң.
«Білім қай заманда да халықты біріктіріп, адамзатты өркениеттің шыңына жетеледі. Сіздердің қарым-қабілеттеріңіз медицина, білім, экология және басқа да өте маңызды салалардағы тың шешімдерге негіз бола алады. Дәл осы олимпиадада әлемді өзгертетін жаңа идеялар мен жобалар дүниеге келуі мүмкін», – деді Қасым-Жомарт Тоқаев.
Президент барлық қатысушыларға сәттілік тілеп, олимпиаданы ұйымдастыруға атсалысқан азаматтарға алғыс айтты.
Әлемнің 106 елінен келген дарындар Астанада бас қосты
Салтанатты рәсімде халықаралық технология саласының және қазақстандық IT қауымдастығының танымал өкілдері сөз сөйледі. Олардың қатарында:
- Sinovation Ventures және 01.ai компанияларының бас директоры Ли Кай Фу;
- Жасанды интеллект бойынша халықаралық олимпиада кеңесінің төрағасы Елена Маринова;
- Қазақстанның спорттық бағдарламалау федерациясының президенті Бағдат Мусин;
- Kaspi.kz негізін қалаушылардың бірі Михаил Ломтадзе;
- Freedom Holding Corp. компаниясының бас атқарушы директоры Тимур Турлов болды.
Рәсім барысында Мемлекет басшысы олимпиаданың құрылымымен танысып, қатысушылар орындайтын тапсырмаларды және автономды роботтардың жұмысын тамашалады.
.jpg)
Астана бірнеше күнге әлемдік AI орталығына айналды
Жасанды интеллект бойынша III халықаралық олимпиада 2–8 тамыз аралығында Астанада өтеді. Биылғы додаға 106 мемлекеттен 500-ден астам дарынды оқушы жиналды.
Қатысушылар жасанды интеллект модельдерін әзірлеу және автономды роботтарды бағдарламалау бойынша өзара бақ сынайды.
Бұл олимпиада Қазақстанның халықаралық технологиялық күн тәртібіндегі орнын күшейтіп қана қоймай, елдің жас таланттарды қолдауға бағытталған саясатының нақты көрінісіне айналып отыр. Әлемнің үздік оқушылары бас қосқан бұл алаңда болашақтың жаңа технологиялары мен тың идеялары дүниеге келуі әбден мүмкін.
