Әзірге нақты бағдарлама бекітілген жоқ.
Дегенмен Tokyo Metropolitan University басшылығымен өткен келіссөзде ынтымақтастықтың үш бағыты айқындалды: академиялық ұтқырлық, бірлескен зерттеулер және маман даярлау, деп хабарлайды DKNews.kz.
Қазақстанның Ғылым және жоғары білім министрі Саясат Нұрбек пен Қазақстанның Жапониядағы Төтенше және Өкілетті Елшісі Ерлан Баударбек-Қожатаев жапон университетінің ректоры Такая Охашимен кезд кездесті. Бұл туралы ҚР Ғылым және жоғары білім министрлігі хабарлады.
Студенттер үшін жаңа академиялық бағыт ашылуы мүмкін
Тараптар Қазақстан мен Жапония университеттері арасындағы тікелей байланысты кеңейту жолдарын талқылады. Келіссөздің негізгі бөлігі студенттер алмасуына, академиялық ұтқырлыққа және оқытушылардың бірлескен жұмысына арналды.
Егер бұл бастамалар нақты келісімдермен бекітілсе, қазақстандық студенттер жапон университетінің білім беру бағдарламаларына қатыса алады. Оқытушылар мен ғалымдар үшін ортақ зерттеу жобаларына қосылуға мүмкіндік туады.
Әзірге Қазақстан тарапынан қай университеттердің серіктес болатыны жарияланған жоқ. Болашақ бағдарламалардың мамандықтары, квотасы, іріктеу мерзімі мен қаржыландыру шарттары да нақтыланбаған.
Дәл осы талаптар жаңа мүмкіндіктің көпшілік студентке қолжетімді болатынын немесе санаулы зерттеу тобымен шектелетінін анықтайды.
Ғылыми жобаларды университеттер тікелей іске асыра алады
Кездесуде бірлескен ғылыми зерттеулер жүргізу мәселесі де көтерілді. Қазақстан тарапы ғалымдар арасында тәжірибе алмасуға және мамандарды бірге даярлауға мүдделі.
Мұндай серіктестік университеттердің тікелей жұмыс істеуіне жол ашады. Жоғары оқу орындары зерттеу тақырыптарын өздері айқындап, ортақ ғылыми топтар құрып, академиялық жобаларды іске қоса алады.
Алайда зерттеулердің нақты бағыттары кездесуден кейін жарияланған жоқ. Тараптарға басым салаларды, жауапты ұйымдарды және қаржыландыру көздерін әлі де келісу қажет.
Tokyo Metropolitan University шетелдік студенттерге бет бұрды
Tokyo Metropolitan University — Токио үкіметі құрған мемлекеттік университет. Оқу орны іргелі және қолданбалы ғылыммен қатар, ірі қалалардың мәселелеріне арналған зерттеулер жүргізеді.
Университет 2027 оқу жылынан бастап бірнеше бағытта ағылшын тіліндегі бағдарламаларды іске қосуды жоспарлап отыр. Ал 2028 жылы жаңа халықаралық факультет ашылмақ. Бұл жоспар ректор Такая Охашидің ресми жолдауында көрсетілген.
Жапон университетінің халықаралық байланыстарды кеңейтуі қазақстандық жоғары оқу орындары үшін қолайлы кезең туғызады. Ағылшын тіліндегі бағдарламалар шетелдік студенттер мен зерттеушілердің қатысуын жеңілдете алады.
Қарашадағы форум ниетті нақты жобаға айналдыруы мүмкін
Саясат Нұрбек Такая Охашиді 2026 жылғы қарашада Астанада өтетін Стратегиялық серіктестер форумына шақырды.
Форумға Қазақстанның жетекші университеттері мен шетелдік жоғары оқу орындарының өкілдері жиналады. Осы алаңда қазақ-жапон ынтымақтастығы университетаралық келісімдерге, алмасу бағдарламаларына немесе бірлескен зерттеулерге ұласуы мүмкін.
Қазіргі кезеңде тараптар жұмыстың негізгі бағыттарын ғана белгіледі. Келесі қадам — серіктес университеттерді, мамандықтарды және студенттер мен ғалымдардың қатысу шарттарын анықтау.
