Корея Республикасының Президенті Ли Чжэ Мён Қазақстан Президенті Қасым-Жомарт Тоқаев пен ҚР Ұлттық қауіпсіздік комитетіне жария түрде алғыс білдірді.
Ол бұл туралы әлеуметтік желідегі парақшасында жазды, деп хабарлайды DKNews.kz.
Бұған Қазақстан аумағында ұсталған, Корея азаматтарына қарсы телефон алаяқтығымен айналысты деген күдікке ілінген ұйымдасқан қылмыстық топ мүшелерінің қысқа мерзімде Оңтүстік Кореяға қайтарылуы себеп болды.
Корея тарапының мәліметінше, күдіктілер Камбоджа мен Вьетнам арқылы Қазақстанға жасырын кіріп, Корея Республикасының азаматтарына қарсы телефон алаяқтығын ұйымдастырған.
Қазақстанда қолға түскен қылмыстық топ мүшелері ұсталғаннан кейін небәрі екі апта ішінде толықтай еліне қайтарылған. Қазіргі уақытта оларға қатысты тергеу амалдары жүргізіліп жатыр.
Оңтүстік Корея президенті бұл жұмыстың жедел жүзеге асуына Қазақстанның қолдауы айрықша ықпал еткенін атап өтті.
«Ұстау шарасынан бастап елге жеткізуге дейінгі жұмыстың жедел атқарылуы Қазақстан Республикасы Президенті Қасым-Жомарт Тоқаев мырзаның және ҚР Ұлттық қауіпсіздік комитетінің белсенді қолдауы мен ынтымақтастығының арқасында мүмкін болды».
Ли Чжэ Мён Қазақстан басшысына және операцияға қатысқан тараптарға ризашылығын білдірді.
«Президент Қасым-Жомарт Тоқаев мырзаға және тиісті тараптарға шын жүректен алғысымызды білдіреміз».
Сонымен қатар ол келесі айда өтетін «Корея Республикасы – Орталық Азия» саммитінде Қасым-Жомарт Тоқаевпен жүздесіп, алғысын жеке жеткізуге мүмкіндік болады деп үміттенетінін жеткізді.
«Келесі айда өтетін “Корея Республикасы – Орталық Азия” саммитінде тікелей жүздесіп, алғысымызды жеке жеткізуге мүмкіндік болады деп сенеміз».
«Қай жерде жасырынса да, соңына дейін іздейміз»
Оңтүстік Корея басшысы өз азаматтарының қауіпсіздігіне қатер төндіретін қылмыстық топтарға қатысты қатаң ұстанымын да білдірді.
«Корея Республикасы азаматтарының қауіпсіздігі мен бейбіт өміріне қатер төндіретін қылмыстарға қарсы ешқандай ерекшелік жасалмайды. Қай жерде жасырынса да, оларды соңына дейін іздеп тауып, міндетті түрде заң алдында жауапқа тартамыз».
Бұл оқиға трансұлттық телефон алаяқтығымен күресте мемлекеттер арасындағы жедел ынтымақтастықтың қаншалықты маңызды екенін тағы көрсетті. Қылмыстық топтар бір елде отырып, басқа мемлекеттің азаматтарын нысанаға алатындықтан, мұндай істерде құқық қорғау және арнайы қызметтердің үйлесімді әрекеті шешуші рөл атқарады.
Бұл жолы күдіктілерді ұстаудан бастап, Оңтүстік Кореяға жеткізуге дейінгі процесс бар болғаны екі аптаға созылған.
Әзірге күдіктілердің нақты саны, олардың Қазақстанның қай өңірінде ұсталғаны және қылмыстық әрекеттен келген шығын көлемі туралы толық мәлімет жарияланған жоқ.
