Қазақстан Жапониямен өнеркәсіптік әріптестікті күшейтуді жалғастырып жатыр.
Келіссөздердің негізгі бағыты — жаңа инвестициялық жобалар мен жапон технологияларын өндіріске енгізу, деп хабарлайды DKNews.kz.
ҚР Өнеркәсіп және құрылыс министрі Ерсайын Нағаспаев Жапонияның экономика, сауда және өнеркәсіп вице-министрі Кенжи Ямадамен кездесті. Тараптар инвестициялық ынтымақтастық пен өнеркәсіптік кооперацияны одан әрі дамыту мәселелерін талқылады.
17 бірлескен жобаның құны $940 млн-ға жуықтады
Қазақстан мен Жапония арасындағы өнеркәсіптік ынтымақтастықтың негізгі көрсеткіштерінің бірі — бірлескен жобалар портфелі.
Ерсайын Нағаспаевтың айтуынша, қазір жалпы құны шамамен $940 млн болатын 17 бірлескен жоба жүзеге асырылып жатыр. Оның 10-ы пайдалануға берілген.
«Қазақстан Жапониямен стратегиялық әріптестікті жоғары бағалайды. Соңғы жылдары экономика, өнеркәсіп және инвестиция салаларындағы қарым-қатынасымыз айтарлықтай нығайды. Қазір өнеркәсіптік кооперация аясында жалпы құны шамамен $940 млн болатын 17 бірлескен жоба жүзеге асырылып жатыр, оның 10-ы сәтті пайдалануға берілді. Ынтымақтастықтың жаңа бағыттары белсенді түрде пысықталуда. Біз барлық инвестициялық жобаларды іске асыруға жан-жақты жәрдемдесуге және қолдау көрсетуге дайынбыз», — деді Ерсайын Нағаспаев.
17 жобаның 10-ының іске қосылуы екі ел арасындағы келісімдердің бір бөлігі нақты өндірістік кезеңге өткенін көрсетеді.
$3,7 млрд-тан асатын келісімдер енді нақты жобаларға айналуы тиіс
Қазіргі келіссөздер Президент Қасым-Жомарт Тоқаевтың 2025 жылғы желтоқсанда Жапонияға жасаған сапары барысында қол жеткізілген уағдаластықтардың жалғасы болды.
Сапар аясында жалпы сомасы $3,7 млрд-тан асатын 60-тан астам екіжақты құжатқа, оның ішінде коммерциялық келісімдерге қол қойылған. Олардың бір бөлігі Қазақстан өндірісіне жапондық озық технологиялар мен шешімдерді енгізуге бағытталған.
Ендігі негізгі мәселе — қол қойылған құжаттардың нақты инвестициялық және өнеркәсіптік жобаларға айналуы. Осы тұрғыдан алғанда, қазір жүзеге асырылып жатқан 17 жоба екі ел арасындағы экономикалық әріптестіктің практикалық нәтижесін көрсетеді.
Келесі маңызды кездесу Астанада өтеді
Ерсайын Нағаспаев алдағы Қазақстан-Жапония экономикалық ынтымақтастық жөніндегі үкіметаралық комиссиясының 9-отырығына да ерекше назар аударды.
Отырыс 2026 жылғы желтоқсанда Астанада өтеді деп жоспарланған.
Кездесу қорытындысы бойынша тараптар екіжақты әріптестікті одан әрі дамыту және өнеркәсіптік ынтымақтастықтың жаңа бағыттарын пысықтау жөнінде уағдаласты.
Бұған дейін біз Қазақстан мен Жапония арасындағы 17 өнеркәсіптік жобаның жалпы құны $940 млн-ға жеткені туралы жазған едік. Ендігі маңызды кезең — желтоқсанда Астанада өтетін үкіметаралық комиссия отырысы.
