Қазақстан ЮНЕСКО-ға жаңа номинация дайындап жатыр.
Оған Жаркент мешіті мен Алматыдағы Вознесенск кафедралды соборы енгізілді, деп хабарлайды DKNews.kz.
Бұл мәселе Парижде Қазақстанның Мәдениет және ақпарат министрі Арман Қырықбаев пен ЮНЕСКО-ның бас директоры Халед әл-Анани арасындағы кездесуде талқыланды. Кездесу Ермек Серкебаевтың 100 жылдығына арналған іс-шаралар аясында өтті.
Жаркент мешіті мен Вознесенск соборы бір номинацияға енгізілді
Қазақстан ЮНЕСКО-ның Дүниежүзілік мұра орталығына «Жетісудың киелі ағаш сәулеті: мәдениетаралық диалог пен тұрақтылық мұрасы» атты сериялық номинацияны алдын ала бағалау жөнінде сұрау жолдады.
Оның құрамына Жаркент мешіті мен Вознесенск кафедралды соборы кірді.
Бастама Қазақстан Президенті Қасым-Жомарт Тоқаевтың тапсырмасымен қолға алынған.
Посмотреть эту публикацию в Instagram
Алдын ала бағалау нысандардың бірден ЮНЕСКО-ның Дүниежүзілік мұра тізіміне енгізілетінін білдірмейді. Бұл — номинацияны дайындау және халықаралық талаптарға сәйкестігін бағалау үдерісінің бір кезеңі.
Арман Қырықбаев ЮНЕСКО басшылығы мен ұйым хатшылығына Қазақстанның бастамаларын қолдағаны үшін алғыс білдіріп, елдің мәдени мұрасын сақтау мен халықаралық деңгейде танытудағы ұйымның рөліне назар аударды.
Серкебаевтың 100 жылдығы Париждегі негізгі мәдени оқиғаға айналды
Кездесу қазақ опера өнерінің көрнекті өкілі, КСРО халық әртісі Ермек Серкебаевтың 100 жылдығына арналған іс-шаралармен қатар өтті.
Қазақстанның бастамасымен әншінің 100 жылдығы 2026 жылы ЮНЕСКО қатысуымен атап өтілетін мерейтойлар тізіміне енгізілген.
Тараптар мәдени мұра саласындағы ынтымақтастықпен қатар, ЮНЕСКО-ның Алматыдағы Өңірлік кеңсесінің жұмысы мен оның Орталық Азиядағы байланыстарды дамытудағы рөлін де талқылады.
ЮНЕСКО штаб-пәтерінде «Дәуір дауысы» концерті өтті
Екіжақты кездесуден кейін ЮНЕСКО-ның Париждегі штаб-пәтерінде Ермек Серкебаевтың 100 жылдығына арналған «Дәуір дауысы» гала-концерті өтті.
Кеш қонақтарының қатарында ЮНЕСКО-ның Дүниежүзілік мұра орталығының директоры Лазар Элунду Ассомо, дипломатиялық корпус өкілдері, сондай-ақ әншінің туыстары мен жақындары болды.
Арман Қырықбаев салтанатты кешті аша отырып, Серкебаев мұрасының халықаралық деңгейдегі маңызына тоқталды.
«Қазақстан Республикасының Президенті Қасым-Жомарт Тоқаев ЮНЕСКО-мен ынтымақтастықты нығайтуға және ұлттық мәдени мұраны халықаралық деңгейде ілгерілетуге ерекше көңіл бөледі. Ермек Серкебаевтың мерейтойын ЮНЕСКО штаб-пәтерінде атап өту біз үшін үлкен мәртебе. Ермек Бекмұхамедұлы әлемнің 50-ге жуық елінде, соның ішінде Франция сахналарында өнер көрсетті. Бүгінгі кеш оның халықаралық көрерменмен шығармашылық диалогының жалғасы», — деді Қазақстанның Мәдениет және ақпарат министрі Арман Қырықбаев.
Концерт бағдарламасын Абай атындағы Қазақ ұлттық опера және балет театрының солистері, хоры мен симфониялық оркестрі ұсынды.
Сахнада қазақ және әлемдік опера классикасының туындылары, соның ішінде Ермек Серкебаевтың репертуарындағы шығармалар орындалды.
Кештің ерекше сәттерінің бірі — әншінің жиені, белгілі скрипкашы Жамиля Серкебаеваның өнер көрсетуі болды.
Серкебаевтың мерейтойы бұған дейін Астанада аталып өтті
Ермек Серкебаевтың 100 жылдығына арналған концерт бұған дейін Астанада да өткен.
Мерейтойлық кешке Қазақстан Президенті Қасым-Жомарт Тоқаевтың құттықтауы жолданған. Мемлекет басшысы Ермек Серкебаевты ұлттық өнердің дамуына өлшеусіз үлес қосқан бірегей талант ретінде атап өткен.
Бұған дейін біз Астанада Ермек Серкебаевтың 100 жылдығына арналған концерттің қалай өткенін жазған едік. Мерейтойлық кеш туралы толығырақ
Париждегі кездесудің нәтижесінде мәдени бағдарлама ғана емес, Қазақстанның жаңа ЮНЕСКО номинациясы да назарға шықты. Енді Жаркент мешіті мен Вознесенск кафедралды соборы халықаралық бағалау рәсімінің келесі кезеңдерінен өтуі тиіс.
