Қазақ киносының аңыз актрисасы халықаралық марапатқа ие болды. Қазақстанның еңбек сіңірген әртісі Наталия Арынбасарова түркі әлемінің мәдениеті мен кино өнерін дамытуға қосқан ерекше үлесі үшін ТҮРКСОЙ ұйымының Құрметті алтын медалімен марапатталды. Салтанатты рәсім Қазақстанның Ресейдегі елшілігінде өтті, деп хабарлайды DKNews.kz.
Бұл туралы 3 қарашада Қазақстан Республикасының Ресей Федерациясындағы елшілігі хабарлады. Марапатты актрисаға Қазақстанның Ресейдегі елшісі Дәурен Абаев табыстады.
Марапаттау Наталия Арынбасарованың 80 жылдық мерейтойына орай ұйымдастырылды. Актриса 24 қыркүйекте 80 жасқа толған болатын.
«Алғашқы ұстаздан» Венецияға дейін: актриса қандай жетістігі үшін марапатталды?
Наталия Арынбасарова Қазақстан киносының тарихында ғана емес, әлемдік кинематографияда да өзіндік орны бар актрисалардың бірі.
Оған халықаралық деңгейде танымалдық әкелген туындылардың бірі – «Алғашқы ұстаз» фильмі.
1966 жылы осы картинадағы Алтынай рөлі үшін актриса Венеция халықаралық кинофестивалінде «Үздік әйел рөлі» аталымы бойынша беделді Вольпи кубогын жеңіп алды.
Бұл марапат оның шығармашылық жолындағы ең ірі жетістіктердің біріне айналды.
Ал араға 60 жыл салып, актрисаның өнердегі еңбегі тағы бір халықаралық марапатпен бағаланып отыр.
Халықаралық түркі мәдениеті ұйымы – ТҮРКСОЙ-дың бас хатшысы Сұлтан Раевтың құттықтауында алтын медаль актрисаның мерейтойына орай және түркі әлемінің мәдениеті мен кино өнерін дамытуға қосқан айрықша үлесін мойындау белгісі ретінде берілгені айтылған.
Дәурен Абаев актрисаның қазақ киносына қосқан үлесін атап өтті
Мәскеуде өткен салтанатты рәсімде Қазақстанның Ресейдегі елшісі Дәурен Абаев Наталия Арынбасарованың шығармашылығына жоғары баға берді.
Дипломаттың айтуынша, актриса түскен фильмдер отандық кинематографияның классикасына айналды. Ал оның экранда сомдаған кейіпкерлері миллиондаған көрерменнің жүрегінен орын алды.
Елші Наталия Арынбасароваға зор денсаулық, амандық және жаңа шығармашылық табыстар тіледі.
Марапаттау рәсіміне орай Қазақстан елшілігінің фойесінде актрисаның өнер жолына арналған фотокөрме ұйымдастырылды.
Көрмеде оның кино әлеміндегі жарқын сәттері мен шығармашылық өмірбаянын бейнелейтін фотосуреттер ұсынылды.
70-тен астам фильм: Арынбасарованың ең танымал рөлдері
Наталия Арынбасарованың шығармашылық қоржынында 70-тен астам фильм мен телехикая бар.
Оның кино өнеріндегі жолы қазақ халқының тарихымен, Орталық Азия әдебиетімен және өңірдің мәдени мұрасымен тығыз байланысты.
Актрисаның ең танымал туындыларының қатарында Шыңғыс Айтматов шығармаларының желісімен түсірілген «Алғашқы ұстаз» бен «Жәмилә» фильмдері бар.
Қазақстандық көрермен үшін оның «Мәншүк туралы жыр» фильміндегі рөлі де ерекше орын алады. Бұл картинада актриса қазақтың батыр қызы Мәншүк Мәметованың бейнесін сомдады.
Сонымен қатар ол «Транссібір экспресі», «Ұлан», «Ләйләнің дұғасы», «Мұстафа Шоқай», «А-ға оралу» және «АЛЖИР» сияқты белгілі туындыларға түскен.
Аталған фильмдер әртүрлі тарихи кезеңдерді қамтиды. Олардың арасында соғыс тақырыбына арналған драмалар да, тарихи тұлғалардың тағдырын баяндайтын картиналар да бар.
ТҮРКСОЙ-дың алтын медалі Қазақстан үшін несімен маңызды?
ТҮРКСОЙ – түркітілдес халықтардың мәдени байланыстарын нығайтуға, ортақ тарихи және рухани мұраны сақтауға бағытталған халықаралық ұйым.
Ұйымның алтын медалі мәдениет пен өнердің дамуына елеулі үлес қосқан тұлғаларға табысталады.
Әр жылдары бұл марапатқа қазақстандық ақын әрі жазушы Олжас Сүлейменов пен түрік киносының әйгілі актрисасы Түркан Шорай да ие болған.
Наталия Арынбасарованың марапатталуы қазақ киносының халықаралық деңгейдегі беделін тағы бір мәрте айқындады.
Актрисаның шығармашылығы бір елдің шеңберімен шектелмейді. Оның өнер жолында қазақ тарихы, Шыңғыс Айтматов шығармашылығы және Орталық Азия халықтарына ортақ мәдени құндылықтар тоғысқан.
Бұған дейін Наталия Арынбасарованың 80 жылдық мерейтойына орай ТҮРКСОЙ-дың алтын медаліне лайық деп танылғаны хабарланған болатын. Енді сол марапат актрисаға Мәскеуде салтанатты түрде табысталды.
Ал оның кинодағы ең биік жетістіктерінің бірі саналатын Венеция кинофестивалінің Вольпи кубогы арада 60 жыл өтсе де, шығармашылық өмірбаянындағы айрықша белес болып қала береді.
