Қарағанды облысында жаңа оқу жылының басталуы дәстүрлі салтанатты жиындармен және сынып сағаттарымен атап өтілді, деп хабарлайды Деловой Қазақстан.
Өңірдегі 405 мектептің 173 мыңнан астам оқушысы үшін мереке ұйымдастырылды.
Мектеп табалдырығын алғаш рет 18 мыңнан астам бірінші сынып оқушысы аттады. Биыл 11 сыныпты жеті мыңға жуық оқушы аяқтайды.
Мектеп оқушыларын Білім күнімен облыс әкімінің орынбасары Ербол Әліқұлов құттықтады. Ол Майқұдық шағын ауданындағы №14 жаңа мектеп-гимназияда болды.
- Бүгін біз осы шағын аудан үшін арнайы ашылған жаңа мектепке жиналып отырмыз. Үш жыл ішінде облыста сегіз жаңа мектеп есігін айқара ашты. Тағы 15-ін салу жоспарда бар. Бұл заманауи оқу орындары болады. Біздің балаларымыз оқуға және жаңа нәрселерді үйренуге үлкен ықыласқа ие болсын! - деді Ербол Әліқұлов.
Мемлекеттік тілде оқытатын №14 мектеп-гимназиясы бір ауысымда 600 орынға есептелген. Оның ашылуы жақын маңдағы бірнеше оқу орындарының жүктемесін азайтуға және № 95 мектепте үш ауысымдық оқудан арылуға мүмкіндік берді.
- Қазір бізде 723 оқушы бар. Біз одан да көп бала жинай аламыз, - дейді №14 мектеп-гимназия директорының м.а. Өрікбай Аринов. - Төрт бірінші сынып құрылды, онда 107 бала оқиды. Оныншы сыныптар: біреуі гуманитарлық бағытпен, екіншісі – жаратылыстану-математикалық. Педагогтар № 95 мектептен ауыстырылды. Сондай-ақ конкурс бойынша жетіспейтін мұғалімдерді жинадық.
Мектеп ең заманауи, интерактивті жабдықтармен жабдықталған. Мүмкіндігі шектеулі балалар үшін қолайлы жағдайлар жасалған. Лифт және арнайы санитарлық бөлмелер бар. Алдағы уақытта инклюзивті кабинеттер ашылады.
Үлкен спорт залы және тартан жабыны бар көше спорт алаңдары бар. ART-студия мен IT-кабинет, сондай-ақ ұлдар мен қыздарға арналған шеберханалар жұмыс істейтін болады. Оқушылар өздерінің шығармашылық қабілеттерін телестудияда, медиаорталықта және жасыл зертханада жүзеге асыра алады.
Оқушылардың қауіпсіздігі ойластырылған. Кіреберісте турникеттер орнатылған. Болашақта әр оқушы кіру үшін рұқсат картасын алады. Бұл оларға асханада тамақ ақысын төлеуге мүмкіндік береді.
- Біздің шағын ауданда осындай жаңа, әдемі, кең мектептің ашылғаны өте жақсы. Бұл өте ыңғайлы, өйткені біз жақын жерде тұрамыз. Немерем бірінші сыныпқа барды, болашақта екінші немеремді де осында ауыстырғымыз келеді. Менің ойымша, балаларға мұнда ұнайды және олар қуана оқиды, - дейді бірінші сынып оқушысының әжесі Дина Дакаримова. 
