ҚР Еңбек және халықты әлеуметтік қорғау министрі Светлана Жақыпова БҰҰ Балалар қорының (ЮНИСЕФ) Қазақстандағы өкілі Рашед Мұстафа Сарвармен кездесті. Кездесу барысында ведомство мен халықаралық ұйымның бірлескен ынтымақтастығының басым бағыттары талқыланды, деп хабарлайды DKnews.kz.
Светлана Жақыпова ЮНИСЕФ-ке әлеуметтік жұмыстың тиімділігін арттыруға, халықтың белгілі бір санаттары үшін түрлі қолдау шараларын дамытуға және т. б. бағытталған түрлі жобаларды іске асыруға қолдау көрсеткені үшін алғыс білдірді. Оның ішінде, ведомство басшысы Отбасының цифрлық картасы арқылы медианалық табысты есептеу бойынша бірлескен жұмысты атап өтті.
Министр сонымен қатар ведомствоның бірқатар жаңа бастамаларымен таныстырды. Осылайша, Светлана Жақыпова Қазақстан Республикасында 2030 жылға дейінгі инклюзивті саясат тұжырымдамасының жобасын әзірлеу туралы айтып, ЮНИСЕФ-тің мүгедектігі бар балалар бөлігінде Тұжырымдама жобасына жүргізілген талдау және дайындалған ұсыныстар түріндегі үлесін атап өтті.
Өз кезегінде Рашед Мұстафа Сарвар бірлескен жұмыстың тиімділігін, сондай-ақ әлеуметтік қорғау саласын дамыту жөніндегі ведомствоның бастамасын жоғары бағалады.
Сондай-ақ, тараптар Қазақстан Республикасы мен ЮНИСЕФ-тің 2021-2025 жылдарға арналған ынтымақтастық бағдарламасы шеңберінде жүргізіліп жатқан жұмыстарды талқылады.
