Азаматтық қорғау мемлекеттік жүйесінің дайындығын арттыру және көктемгі су тасқыны кезеңіне дайындық мақсатында еліміздің 11 оңтүстік және батыс өңірінде өткен «Көктем-2025» оқу-жаттығуы аяқталды. Іс-шараның негізгі міндеті төтенше жағдайлардың алдын алу және оларды жою жөніндегі іс-қимылдарды жетілдіру, сондай-ақ басқару органдары мен азаматтық қорғау күштерін ықтимал су тасқыны қауіп-қатерлеріне дайындау болды, деп хабарлайды DKnews.kz.
Оқу-жаттығу су тасқыны жағдайы күрделенген жағдайда ТЖ-ның алдын алуға бағытталған су тасқынына қарсы іс-шараларды өткізу бойынша кешенді міндет форматында өтті. Практикалық бөлім шеңберінде қорғаныс бөгендерін нығайту, су өткізу құрылыстарын, каналдар мен арықтарды тазарту, сондай-ақ инертті материалдар дайындау және қар шығару сияқты негізгі іс-шаралар орындалды.
Мәселен екі күндік оқу-жаттығу барысында 6,6 км бөген нығайтылды, 235 су өткізу құрылысы, 5,3 км каналдар мен арықтар тазартылды. Сонымен қатар 60 мың тонна инертті материал дайындалып, 273 текше метр қар шығарылды. Халықтың әлеуметтік осал топтарына көмек көрсетілді: 968 тұрғын үй мен 46 әлеуметтік объектінің аула аумағы тазартылды.
ТЖ-ға дайындық аясында хабарлау және байланыс жүйесінің әзірлігі де тексерілді.
Оқу-жаттығу аясында 235 тактикалық-арнайы оқу-жаттығу өтті, оған 8 мыңнан астам адам, 2 мың бірлік техника және 2 әуе кемесі жұмылдырылды. Осы іс-шаралар барысында ТЖМ аумақтық бөлімшелері мен жергілікті атқарушы органдардың алдағы су тасқыны жағдайында әрекет етуге дайындығы тексерілді.
Оқу-жаттығу нәтижесінде аумақтардың қауіпсіздік паспорттары нақтыланды, ТЖ-ны жою жоспарлары түзетілді, сондай-ақ азаматтық қорғау мемлекеттік жүйесі қызметтерінің тиімді өзара іс-қимылы үшін картографиялық материалдар жаңартылды. РКШОЖ қорытындысында жергілікті атқарушы және орталық мемлекеттік органдардың өкілдері биылғы су тасқыны кезеңіне дайындық барысы туралы баяндады.
