Қытай Елшілігі Л.Н. Гумилев атындағы Еуразия ұлттық университетінде «ШЫҰ университетте: Фотокөрме, диалог және ортақ болашақ» атты көрме өткізді.
Көрменің ашылу рәсіміне Қытайдың Қазақстандағы елшісі Хань Чуньлинь, Қазақстан Республикасының ШЫҰ ұлттық үйлестірушісі Мұрат Мұқышев және Л.Н. Гумилев атындағы ЕҰУ ректоры Ерлан Сыдықов қатысты.
Бұл көрме Шанхай ынтымақтастық ұйымы аясындағы ынтымақтастықты нығайтуға арналған. Көрмеге 24 жұмыс қойылған.
Университет ректоры Ерлан Сыдықов университеттің негізгі қызметін қысқаша таныстырды.
Бүгін біз үшін Л.Н. Гумилев атындағы Еуразия ұлттық университетінде сіздерді «ШЫҰ университетке енеді: Фотокөрме, Диалог және Ортақ Болашақ» атты іс-шарада қарсы алу – үлкен құрмет және мәртебе. Біздің университет – Қазақстандағы жоғары білім мен ғылым саласындағы көшбасшылардың бірі. 2022 жылдың қыркүйек айынан бастап ЕҰУ зерттеу университеті мәртебесін алды. Университетіміздің жетістіктері халықаралық білім кеңістігінде мойындалып, әлемдік рейтингтерде жоғары бағалануда. Мысалы, 2024 жылғы QS рейтингі бойынша университет әлемде 321-орынды иеленсе, Азияның үздік 100 университетінің қатарына кіреді. – деп айтты ол.
Университет шамамен 500 шетелдік серіктеспен, оның ішінде ШЫҰ-ға мүше елдердегі жоғары оқу орындарымен ғылыми-білім беру жобаларын жүзеге асыру, академиялық ұтқырлық бағдарламалары, бірлескен білім беру бағдарламалары және шетелдік мамандарды тарту бағытында белсенді ынтымақтастық орнатқан.
Қытай университеттерімен ынтымақтастық – Л.Н. Гумилев атындағы Еуразия ұлттық университетінің стратегиялық бағыттарының бірі. Қазіргі уақытта біз Қытайдың Нанкай университеті, Сиань шетел тілдері университеті, Шанхай шетел тілдері университеті, Пекин тілі және мәдениеті университеті, Қытай халық университеті, Гонконг баптистік университеті, Нанкин аудит университеті, Линнань университеті және тағы басқа 30 жоғары оқу орнымен тығыз байланыс орнаттық. Университетімізде Конфуций институты жұмыс істейді, қытай филологиясы кафедрасы ашылған. Қытай тілін оқыту және дәрістер өткізу үшін Қытайдан шетелдік мамандар тартылуда. Бүгінде университетімізде түрлі мамандықтар бойынша Қытайдан келген 300-ге жуық студент білім алуда, сондай-ақ академиялық ұтқырлық бағдарламасы аясында Қытайда 7 студент оқуда, - деп айтты ректор Ерлан Сыдықов жиында.
Ал Қытай елшісі Хань Чуньлинь фотокөрмені ұйымдастыруға қолдау білдірген әріптестеріне алғысын жеткізді.
Биыл Шанхай ынтымақтастық ұйымының құрылғанына 25 жыл толады. Соған орай біз мұқият таңдалған 24 фотосуретті ұсынып отырмыз. Бұл суреттер бізге ұйымның даму тарихына көз жүгіртіп, оның негізгі құндылықтарымен – «Шанхай рухымен» танысуға және оның болашақ даму келешегін кеңінен көруге мүмкіндік береді, - деді елші.
ШЫҰ 2001 жылы 15 маусымда Қытайдың Шанхай қаласында құрылды. Оған дейін ол «Шанхай бестігі» форматында жұмыс істеді. ШЫҰ-ның негізін қалаушы мемлекеттер қатарында Қытай, Қазақстан, Қырғызстан, Ресей, Тәжікстан және Өзбекстан бар.
Дипломат атағандай, 2000 жылдардың басында халықаралық қатынастар тарихында маңызды оқиға болған ШЫҰ-ның құрылуы мүше мемлекеттер арасындағы ынтымақтастықтың жаңа парағын ашып, өңірлік өзара іс-қимылдың жаңа форматын қалыптастырды.
24 жыл ішінде ШЫҰ өз достарының шеңберін үнемі кеңейтіп, ықпалын арттыра берді. Бүгінде ШЫҰ бастапқыда 6 мүшесі бар өңірлік ұйымнан үш құрлықты қамтитын, құрамында 26 мемлекет бар үлкен отбасына айналды. Олардың ішінде 10 толыққанды мүше, 2 бақылаушы мемлекет және 14 диалог бойынша серіктес ел бар.
Бүгінгі фотокөрме өте өзекті уақытта өтіп отыр. Сіздердің әрдайым ШЫҰ-ның даму барысын бақылап, болашақта «Шанхай рухын» жалғастыру мен ілгерілету жолында белсенді түрде атсалысатыныңызға сенемін. Осылайша, халықтар арасындағы достықты нығайтуға, бейбітшілік пен даму ісіне өздеріңіздің жасампаз күш-жігерлеріңізді қосасыздар, - деп сөзін қорытындылады елші Хань Чуньлинь.
Ал Қазақстан Республикасының ШЫҰ ұлттық үйлестірушісі Мұрат Мұқышев Л.Н. Гумилев атындағы Еуразия Ұлттық университеті өз тәжірибесінде заманауи білім беру технологияларының үздік әзірлемелерін іске асыратын және сапалы білім беру қызметтерін ұсынатын Қазақстанның жетекші жоғары оқу орындарының бірі екенін атап өтті.
Университет түлектері дайындықтың ең жоғары деңгейін көрсетеді. Бұл жай ғана мақтау емес. Көптеген студенттер ШЫҰ Жастар кеңесінің мүшелері, «ШЫҰ моделі» интерактивті ойынының қатысушылары болып, белсенді өзара іс-қимыл жасап, өңірлік ынтымақтастықты дамытуға үлес қосуда. Жақында Ұйым өзінің 25 жылдығын атап өтеді. Бұл тарихи өлшеммен алғанда бұл ұзақ мерзім емес, алайда жүріп өткен жолды түсінуге жақсы себеп, - деп ойын айтты Мұқышев.
Оның айтуынша, ширек ғасырда ШЫҰ, біріншіден, жаңа демократиялық, әділ және ұтымды әлемдік тәртіпті құруға жәрдемдесудің бірегей тетік ретінде орнықты. Екіншіден, ұйым сенім, достық және тату көршілікті нығайту жөніндегі шараларды табысты іске асыруда. Үшіншіден, «Шанхай рухы» қағидаттары көпжақты дипломатияның жаһандық күн тәртібінде үлгілі болды.
Бүгінгі фотокөрме – бұл біздің ұйымның тарихымен, жетістіктерімен және болашағымен танысуға тамаша мүмкіндік. ШЫҰ ынтымақтастығының бірегей моделі, ең алдымен, мемлекет басшыларының күш-жігерінің, сондай-ақ ШЫҰ Хартиясында белгіленген өзара іс-қимыл қағидаттарының арқасында әзірленгенін ерекше атап өткім келеді, - деп сөзін қорытындылады ол.
Көрменің ресми бөлімінен кейін спикерлер бір-біріне сыйлақтарын табыстады.
Сондай-ақ жиынның екінші бөлімінде қатысушылар көрмеге қойылған фотосуреттердің тарихымен танысуға мүмкіндік алды.
Еске сала кетейік, ШЫҰ саммиті биыл күзде Қытайдың Тяньцзинь қаласында өтеді.
