ҚР Ғылым және жоғары білім министрлігі мен Ақтөбе облысы әкімдігінің ұйымдастыруымен Қ.Жұбанов атындағы Ақтөбе өңірлік университетінде 10 және 11 сынып оқушыларына арналған «Study in Kazakhstan» көрмесі басталды, деп хабарлайды DKnews.kz.
Қазақстандық жастарға халықаралық аренада білім алу мүмкіндіктерін ұсынатын көрмеге 40-тан астам жоғары оқу орны қатысуда. Бірінші күні көрмені тамашалауға 1500-ға жуық 10-11 сынып оқушылары және ата-аналары келді.
«Study in Kazakhstan» көрмесінің негізгі мақсаты – Қазақстаннан шықпай-ақ шетелдік ЖОО-да білім алуға мүмкіндік жасау. Көрмеге қатысқан ҚР Ғылым және жоғары білім министрінің кеңесшісі Руслан Емелбаев талапкерлерге бүгінгі ауқымды шараның маңызын тереңнен түсіндіріп, болашақ студенттерге кеңес берді.
«Мемлекет басшысының тапсырмасы аясында Қазақстанда 2022-2024 жылдары аралығында ҚР Ғылым және жоғары білім министрлігі 23 шетелдік жоғары оқу орнымен стратегиялық серіктестік орнатты. 2025 жылы тағы 11 стратегиялық серіктестік көзделіп отыр және жүзеге асуда. Соның нәтижесінде Қазақстанның көптеген өңірлерінде шетелдік ЖОО филиалдарының қос дипломдық оқу бағдарламалары ашылды. Солардың бірі – сіздердің туған қалаңызда орналасқан британдық Heriot-Watt университетінің кампусы екінші жыл қатарынан қазақстандық студенттерге халықаралық деңгейдегі білім беруде. Бүгінгі шара – сіздерге берілген керемет мүмкіндік. Оны толыққанды пайдалануға кеңес беремін» Руслан Емелбаев
Қ.Жұбанов атындағы Ақтөбе өңірлік университетінің Басқарма төрағасы – Ректоры Лаура Қарабасова бұл жиын талапкерлерге маңызды таңдауларын жасауға көмектесу үшін ұйымдастырылғанын атап өтті.
«Қазіргі жастар керемет кезеңде өмір сүріп жатыр. Қазақстаннан шықпай-ақ халықаралық деңгейде білім алу және ең бастысы оны мемлекеттік грант негізінде алу – жастарға жасалған үлкен қолдау» Лаура Қарабасова
Айта кетейік, Ақтөбе қаласында көрме 3-4 сәуір аралығында екі күнге созылады. Әр филиалдың өкілдері талапкерлерге түсу шарттары мен оқу орнының ұсынатын мүмкіндіктері туралы ақпарат беруге дайын.
