Әл-Фараби атындағы Қазақ ұлттық университетінің Биология және биотехнология факультетінде студенттер мен жас ғалымдардың «Фараби әлемі» атты халықаралық ғылыми конференциясы өтті.
Конференцияны ұйымдастырудағы басты мақсат – студенттер мен жас ғалымдардың ғылыми-зерттеу және оқу-ағарту қызметін дамыту, жас ғалымдардың ғылым саласындағы өзекті мәселелерді шешуге қатысты ұсыныстарын тыңдау, әрі талантты жастарды қолдай отырып интеллектуалды орта қалыптастыру.
Шараға Венгрия Республикасындағы Дебрецен университетінен көп жылдан бері екі жақты келісімшарт негізінде жұмыс істеп келе жатқан үздік ғалымдар – Дебрецен университеті мен Венгрия Ғылым Академиясының эволюциялық геномика бойынша зерттеу тобының жетекшісі, PhD доктор, профессор Габор Шрамко және Дебрецен университетінің Ғылым және Технология факультетіне қарасты Биология және Экология институтының директоры, Эволюциялық зоология кафедрасының меңгерушісі, Венгрия Ғылым Академиясының және Еуропа Академиясының академигі, профессор Золтан Барта қатысты. Шетелдік ғалымдар жас зерттеушілердің ғылыми жұмыстарына оң бағасын беріп, қатысушыларға сәттілік тіледі.
Әл-Фараби атындағы ҚазҰУ-да конференция жыл сайын көптеген жас ғалымдарды тартады. Биыл 344 тезис пен мақала қабылданды, оның ішінде Қазақстанның басқа университеттері мен ғылыми-зерттеу институттарынан – 52, және таяу шетелден – 4. Бұл ретте бакалавриат студенттерінен 110 тезис пен мақала, магистранттардан – 169, докторанттардан – 65 және оқушылардан – 21 тезис пен мақала келіп түсті. 83 спикер баяндама жасады.
Конференцияға Ресей мен Өзбекстанның 3 университеті, Қазақстанның 24 жоғары оқу орны мен ғылыми-зерттеу мекемелерінің білім алушылары және қызметкерлері қатысты.
Жадыра АШИРОВА, Биофизика, биомедицина және нейроғылым кафедрасы меңгерушісінің ғылыми-инновациялық жұмыс және халықаралық байланыстар жөніндегі орынбасары, PhD, доцент м.а.
