Бас прокуратурада Бас Прокурордың орынбасары Ғ.А. Садырбековтың төрағалығымен есірткінің заңсыз айналымына қатысты қылмыстық істерді тергеу мәселелері бойынша республикалық форум өтті, деп хабарлайды DKnews.kz.
Форум барысында есірткі қылмыстарымен күресте барлық құқық қорғау және мемлекеттік органдардың күш-жігерін біріктірудің маңыздылығы ерекше атап өтілді.
Іс-шарада ақпараттық технологиялардың дамуы мен есірткі айналымының киберкеңістікке көшуі, күрделі крипто-айырбас желілері арқылы еш жерде тіркелмеген, цифрлық түрде сақталатын активтерді пайдалана отырып, есірткіні байланыссыз сату тәсілдері талқыланды.
Қатысушылар тәжірибеден алынған кейстерді ұсынып, заманауи ақпараттық технологияларды және шетелдік мамандарды тарту арқылы тергеудің жаңа нысандары мен әдістерін ұсынды.
Форум жұмысына арнайы прокурорлар мен құқық қорғау органдарының өкілдері қатысты.
Іс-шара қорытындысы бойынша қазіргі заман талаптарына сай есірткі қылмыстарын тергеу кезінде туындайтын өзекті мәселелерді шешуге бағытталған ұсыныстар әзірленді.
