Қорғаныс ведомствосының басшысы генерал-полковник Руслан Жақсылықов «Terrex – Barys A 8x8» жаңа отандық көп мақсатты сауытты амфибиялық жауынгерлік дөңгелекті машинасының ресми тұсаукесеріне қатысты, деп хабарлайды DKnews.kz.
Іс-шараға Қазақстан Республикасының Өнеркәсіп және құрылыс вице-министрі Рақымжан Исақұлов, ҚР Қорғаныс-өнеркәсіптік кешені кәсіпорындары қауымдастығының төрағасы Айбек Барыс, ҚР ҚӨК кәсіпорындары қауымдастығы төрағасының орынбасары Қайрат Бектүргенев, ST Engineering Land Systems халықаралық қорғаныс бизнесінің басшысы Тан Пек Тонг және басқалар қатысты.
Ұсынылып отырған жауынгерлік машинаның тактикалық-техникалық сипаттамаларымен танысқан Қорғаныс министрі Ел Президенті – Қарулы күштердің Жоғарғы Бас қолбасшысы Қазақстан армиясын қару-жарақ пен техниканың жаңа үлгілерімен жасақтау міндетін қойғанын атап өтті.
– Біздің армиямыз қару-жарақ пен әскери техниканың соңғы үлгілерін алуға лайық. Бұл бүгінгі таңда Мемлекет басшысының бізге қойып отырған талабы. Армия кәсіби, мобильді және барлық жаңа қару-жарақпен қамтамасыз етілуі керек, – деп атап өтті Қорғаныс министрі.
Ол сондай-ақ көп ұзамай жаңа жауынгерлік машина жылдың төрт мезгілінде және әртүрлі климаттық жағдайларда өтетін әскери сынақтарға қабылданатынын айтты.
Естеріңізге сала кетейік, өткен жылдың желтоқсан айында Kazakhstan Paramount Engineering (KPE) және Сингапурдың ST Engineering компаниясы Қазақстанда 8×8 дөңгелекті формуласы бар жаңа көп мақсатты амфибиялық сауытты автокөлік өндіру үшін өндірістік қуат құру туралы стратегиялық келісім жасасқан болатын.
Бұл шарт ST Engineering компаниясының ашық су жағдайында тиімді жұмыс істей алатын далалық сыналған Terrex жаяу әскер жауынгерлік машинасының негізінде автокөлікті жобалау мен өндіруге инженерлік және техникалық қолдау көрсетуді қамтиды.
– KPE өндірістік мүмкіндігі бір ауысымда жылына 500 түрлі сауытты техникаға жетеді. Ал Қазақстанның бірегей географиялық жағдайында, ғылыми зерттеу және пайдалану саласындағы мол тәжірибеміз бізге «ST Engineering» компаниясымен бірлесіп, еліміздің Қарулы күштерін 8х8 дөңгелекті сауытты техникасымен қамтамасыз етуге мүмкіндік береді, – деді ҚР Қорғаныс-өнеркәсіптік кешені кәсіпорындары қауымдастығының төрағасы Айбек Барыс.
Тұсаукесер барысында жаңа авткөлік өндірісі Қазақстандағы KPE зауытында 2025 жылдан бастап жолға қойылатыны атап өтілді.
