Бүгін елордада Қытай тілі күнін мерекелеуге арналған халықаралық семинар өтті.
Семинарды ұйымдастыруға Пекин тілі және мәдениет университетінің (Қазақстан) филиалы мен Астана халықаралық университеті мұрындық болды.
Іс-шараға Қытай Халық Республикасының Қазақстандағы Төтенше және өкілетті елшісі Хань Чуньлин қатысып, Қытай мен Қазақстан арасындағы мәдени байланыстардың тереңдеп келе жатқанын атап өтті.
Елші өз сөзінде Қытай тілі – 5000 жылдық өркениеттің коды екенін айта келе, оның қазіргі заманғы технологиялармен де тығыз байланыста дамып келе жатқанын атап өтті. Оның айтуынша, «Тяньвэнь» (Айды зерттеу жобасы) мен Huawei-дің «Хунмэн» жүйесі — қытай тілінің поэзиясы мен ғылымының үндесуінің көрінісі.
Қытай тілі – тек таңбалар мен дыбыстар жиынтығы емес, ол өркениеттер арасындағы көпір. Қытай мен Қазақстан арасындағы достық – адамзаттың ортақ болашағына бағытталған сенімді қадам, – деді елші.
Семинар барысында дипломат Қазақстандағы қытай тіліне деген қызығушылықтың артып келе жатқанын атап өтті. Бүгінде елде 5 Конфуций институты жұмыс істейді. Қазақстан Үкіметі ірі жоғары оқу орындарында қытай тілін оқыту кафедраларын ашып, оны екінші шет тілі ретінде енгізуді жоспарлап отыр.
Хань Чуньлин қазақстандық қытай тілі мұғалімдеріне және осы салада еңбек етіп жүрген мамандарға алғыс білдіріп, олардың қосқан үлесін жоғары бағалады.
Абай айтқандай, “Шын цивилизация – түрлі тілдердің ойы бірін-бірі жарыққа шығаратын сәтте көрінеді”. Біз де осы ойды басшылыққа алып, мәдениеттер диалогын жалғастыра беруге тиіспіз, – деді ол.
Қытай тілін үйрету – мәдениетті құрметтеудің көрінісі
Астана халықаралық университетінің ректоры Серик Ирсалиев Орталық Азиядағы қытай тілі мұғалімдеріне арналған семинарда Қытай тілін оқытудың маңыздылығын атап өтті.
Қытай тілін сапалы үйрету – бұл тек білім беру емес, сонымен қатар қытай мәдениетін құрметтеу мен оны ұрпаққа жеткізудің маңызды қадамы, – деді ол.
Ирсалиев соңғы жылдары Қазақстан мен Қытай арасындағы білім беру ынтымақтастығы жаңа деңгейге көтерілгенін айтты. Оның мәліметінше, бүгінде Қытайда 4000-ға жуық қазақстандық студент білім алуда, ал Қазақстанда 1000-нан астам қытайлық студент оқып жатыр.
Ректор Пекин тілі және мәдениет университетінің Астанадағы филиалының ашылуын стратегиялық серіктестіктің нақты нәтижесі ретінде атап өтті. Биыл мұнда 30 қытай тілі мұғалімі мен 50 аударма мамандығы бойынша студент даярлау жоспарланып отыр.
Бүгінгі семинар – білім берудегі тәжірибе алмасуға, әрі аймақтағы тіл мамандары арасындағы кәсіби байланысты нығайтуға арналған маңызды алаң, – деді Ирсалиев.
Қытай тілі – мәдениеттер арасын жалғайтын көпір
Л.Н. Гумилев атындағы Еуразия ұлттық университетінің халықаралық қатынастар факультеті жанындағы шығыстану кафедрасының меңгерушісі Гүлнар Бірімқұлова Қытай тілі күніне арналған шарада құттықтау сөз сөйлеп, шығыстанудың даму бағыты мен қытай тіліне деген қызығушылықтың артып келе жатқанын атап өтті.
Қытай тілі күні – тек жазу мәдениетін еске алатын күн емес, ол – тілдердің алуан түрлілігіне деген құрметтің символы, – деді ол.
Гүлнар Бірімқұлованың айтуынша, шығыстану кафедрасы 1999 жылы құрылған және бүгінгі күні Қытай, Жапония, Корея секілді елдердің елшіліктерімен, сондай-ақ шетелдік университеттермен тығыз әріптестік орнатқан.
Кафедрада қытайтану бағыты бойынша мамандар даярланады. Бағдарлама аясында студенттер тек тіл меңгеріп қоймай, қытай тарихы мен мәдениетін терең зерттейді. Университетте қытай тіліне арналған арнайы оқу кабинеті де жұмыс істейді.
Қытай тілін оқуға ниет білдірген студенттердің саны жыл сайын артып келеді. Бұл — еліміздің Шығыс елдерімен қарым-қатынасының күшейіп келе жатқанының бір көрінісі, – деді ол.
Қытай тілі — өркениеттің мәңгілік коды
Тарих ғылымдарының докторы, шығыстанушы және ЮНЕСКО жанындағы халықаралық мәдени орталықтың бас ғылыми қызметкері Клара Хафизова қытай тілі мен жазуының терең маңызын атап өтті.
Қытай тілі — әлемдегі ең көне әрі ең бай жазу жүйелерінің бірі. Ол тек қарым-қатынас құралы ғана емес, сонымен қатар өркениеттің коды, жады мен шығармашылықтың көрінісі, – деді Хафизова.
Маманның айтуынша, қытай иероглифтері мен олардың тарихы — аңыз бен мифке, философия мен бейнелікке толы. Бұл тілде жаңа ұғымдарды жеткізу үшін қарапайым дыбыстық аудармадан гөрі көркем әрі тапқыр тәсілдер қолданылады. Сондықтан қытай тілін үйрену – тек жаттау ғана емес, ми мен есте сақтау қабілетінің ұзақ мерзімді жаттығуы.
Қытай тілін үйрену арқылы біз тек бір халықтың тілін емес, күллі Шығыс халықтарының мәдениетаралық байланыстарын, тіпті тарихын түсіне аламыз, – деді ол.
Хафизова қытай тілінің музыка мен поэзиямен тығыз байланысты екенін, дыбыстық жүйесінің көркем әрі эстетикалық әсерге ие екенін атап өтті. Мысал ретінде Мао Цзэдунның әйгілі өлеңдерін ежелгі әуендермен орындағанын келтірді.
Сарапшы Қытай үкіметінің әлем бойынша қытай тілін насихаттауға қосып жатқан үлесін де ерекше атап өтті. Оның айтуынша, Конфуций институттары, арнайы оқулықтар, және Пекин тілі және мәдениет университетінің Астанадағы филиалы — қытай тілін әлемге таныту жолындағы нақты қадамдар.
Айта кетейік, 16-шы Қытай тілі күні БҰҰ бастамасымен жыл сайын көктем маусымында аталып өтеді. Бұл күн – қытай тілінің халықаралық аренадағы рөлін айқындап, өзге мәдениеттермен өзара ықпалдастығын арттыруға бағытталған.
