Олжас Бектенов қазақстандықтарды 1 мамыр – Қазақстан халқының бірлігі күнімен құттықтады, деп хабарлайды DKnews.kz.
Қазақстан Республикасының Премьер-министрі Олжас Бектенов ел азаматтарын 1 мамыр – Қазақстан халқының бірлігі күнімен шын жүректен құттықтады. Бұл күн ел тарихындағы бейбітшілік пен достықтың, татулық пен ынтымақтың нышаны ретінде ерекше маңызға ие.
Премьер-министр өз құттықтауында халқымыздың бірлігі мен келісімі – еліміздің тұрақты дамуы мен өркендеуінің берік іргетасы екенін атап өтті. «Бірлігі бекем ел озар» деген халық даналығын мысалға келтірген Олжас Бектенов Мемлекет басшысы Қасым-Жомарт Тоқаевтың стратегиялық бағыты да дәл осы құндылықтарға сүйенетінін атап көрсетті.
Бүгінде Қазақстан жаһандық сын-қатерлерге бірлесе төтеп беріп, болашағы жарқын ел ретінде алға басып келеді. Бұл жетістіктің негізінде – ұлт пен ұлыс өкілдерінің өзара түсіністігі мен сыйластығы жатыр.
«Барын бағалай білген, бейбітшілік пен жарастық үстемдік құрған елдің келешегі кемел», – деген Премьер-министр татулық пен ауызбіршілікті сақтау әрбір азаматтың перзенттік парызы екенін ерекше атап өтті.
Құттықтау соңында Олжас Бектенов барша қазақстандықтарға зор денсаулық, отбасылық амандық және еңбекте табыс тіледі.
