Медеуде бақылау-құтқару бекеті тәулік бойы жұмыс істей бастады, деп хабарлайды DKnews.kz.
Қазақстан Республикасының Төтенше жағдайлар министрі генерал-майор Шыңғыс Әріновтің тапсырмасымен Алматы қаласының Медеу ауданында бақылау-құтқару бекеті тәулік бойы жұмыс істей бастады.
Жобаны Алматы қаласының Төтенше жағдайлар департаменті ҚР ТЖМ Республикалық жедел-құтқару жасағымен бірлесіп жүзеге асырды. Бекет №16 өрт сөндіру бөлімінің аумағындағы Кіші Алматы шатқалы, Қимасар, Бутаковка, Просвещенец және Көкжайлау танымал тау маршруттарының жанында орналасқан.
Бекет жедел әрекет ету үшін қажетті барлық заттармен, соның ішінде арнайы техникамен, жабдықтармен және байланыс құралдарымен жарақталған. Кезекшілікті тәуліктің кез келген уақытында оқиға орнына шығуға дайын білікті құтқарушылар атқарады. Орташа ден қою уақыты 1,5–2 сағатқа қысқарды, бұл таулы жерлерде өте маңызды.
«Медеуде тәулік бойы жұмыс істейтін бекет құру — Алматы тұрғындары үшін де, туристер үшін де қауіпсіздік деңгейін арттыруға бағытталған нақты шара» Шыңғыс Әрінов
Бақылау-құтқару бекетін ашу - таулы аудандарда ден қоюға дайындықты арттыру және туристік маусымда қауіпсіз демалысты қамтамасыз ету бойынша кешенді жұмыстың бір бөлігі.
