Қай кезеңде болмасын, байланыс – әскердің басты арқауы, бесқарудың темірқазығы.
Әскери құрылымдардың сап түзеп, бір мақсатқа жұмыла әрекет етуі – нақ осы сенімді де үздіксіз байланыстың нәтижесі, деп хабарлайды DKnews.kz.
Сондықтан да бұл салада қызмет етіп жүрген мамандардың еңбегі әрдайым жоғары құрметке лайық. 17 мамыр – елімізде байланыс саласы қызметкерлерінің кәсіби мерекесі ретінде атап өтіледі. Бұл күн Қазақстан Республикасы Ұлттық ұланының сапындағы әскери байланысшылар үшін де ерекше. Олар үшін бұл – абыройлы қызметке деген адалдық пен кәсібиліктің символы.
Бүгінде Ұлттық ұлан құрамындағы байланыс бөлімшелерінің әскери қызметшілері – озық техниканы жетік меңгерген, заманауи цифрлық жүйелерді шебер игерген мамандар. Радиобайланыс пен спутниктік жүйелер, қорғалған арналар мен шифрланған ақпарат – бәрі де олардың күнделікті жұмыс құралына айналған. Олар кез келген оқу-жаттығуда да, нақты жауынгерлік жағдайда да байланыс жүйесінің үздіксіз жұмысын қамтамасыз етіп келеді. Әскери байланысшының кәсібилігі – бұл тек техникалық біліммен шектелмейді.
Ол – табандылық пен жауапкершілік, шұғыл жағдайда дұрыс шешім қабылдай білу қабілеті. Командир мен жауынгер арасындағы пәрмен мен бұйрықтың уақтылы әрі нақты жетуі – олардың ерен еңбегінің жемісі. Осындай жауапты да абыройлы қызметті атқарып жүрген барша байланыс мамандарын кәсіби мерекелерімен құттықтаймыз! Қашан да байланыстарыңыз берік, еңбектеріңіз еленіп, ел игілігі жолындағы қызметтеріңіз табысты болғай!
